Բաքվում ԱՄն դեսպան․ Ռուսաստանը նույնպես ՄԽ անդամ է, բայց զենք է մատակարարում ե՛ւ Հայաստանին, ե՛ւ Ադրբեջանին

ԱՄՆ-ն ձգտում է օգնել Հայաստանին եւ Ադրբեջանին հակամարտության խաղաղ կարգավորման որոնումներում, այդ պատճառով էլ սպառազինություն չի վաճառում այս եւ մյուս կողմին։ Այս մասին փետրվարի 16-ին ճեպազրույցի ժամանակ հայտարարել Է Ադրբեջանում ԱՄՆ դեսպան Լի Լիցենբերգերը, փոխանցում է Turan-ը։

Ինչո՞վ բացատրել այն, որ ԱՄՆ ազգային անվտանգության հարցերով նախկին խորհրդական Ջոն Բոլթոնի կոչը Բաքվին և Երեւանին ամերիկյան սպառազինություն գնելու վերաբերյալ այդպես էլ չի իրականացվել։

Պատասխանելով Turan-ի այս հարցին ՝ դեսպանն ասել է. «Գլխավորն այն է, որ օգնենք Հայաստանին եւ Ադրբեջանին հասնել խաղաղության։ Մեր սկզբունքային դիրքորոշումն այն է, որ ո՛չ այս, ո՛չ էլ մյուս կողմին մահաբեր սպառազինություն չմատակարարվի։ Մենք նաեւ պատասխանատվություն ենք կրում՝ լինելով ԵԱՀԿ Մինսկի խմբի անդամ։ Ընդգծեմ, որ Ռուսաստանը եւս Մինսկի խմբի անդամ է, բայց բոլորովին այլ կերպ է վերաբերվում իր պարտավորություններին եւ զենք է մատակարարում ե՛ւ Հայաստանին, ե՛ւ Ադրբեջանին։ Մենք չենք կարծում, որ դա ընդունելի ճանապարհ է խաղաղ կարգավորման հասնելու համար», - ասել է դեսպանը։

Միեւնույն ժամանակ նա նշել է, որ ԱՄՆ-ն Ադրբեջանին միջոցներ եւ սարքավորումներ է մատակարարում անվտանգության հարցերի լուծման համար: Վերջին տարիներին այդ մատակարարումների ծավալները գերազանցել են 100 մլն դոլարը։

Դրանք ոչ թե զենք են, այլ սարքավորումներ ու միջոցներ՝ սահմանների պահպանության, Կասպից ծովի ազգային հատվածի մոնիթորինգի համար, ռենտգեն սկաներներ՝ մաքսանենգությունը կանխելու համար ։ Առաջին հերթին, դա վերաբերում է երկրի հարավային սահմաններին, որտեղ թմրանյութերի մեծ հոսք է նկատվում։

«Այն բանից հետո, երբ Ադրբեջանը վերադարձրեց վերահսկողությունը հարավային սահմանների զգալի մասի նկատմամբ, ԱՄՆ-ն զգալի օգնություն է ցուցաբերել այդ հատվածի հուսալի պահպանությունն ապահովելու համար սարքավորումներ մատակարարելու հարցում ։ Վերջին երկու տարիների վիճակագրությունը վկայում է այդ ուղղությամբ առգրավված թմրանյութերի կրկնակի աճի մասին։ Սա ցուցադրում է, թե որքան արդյունավետ է այդ օգնությունը», - ասել Է դիվանագետը։

Մյուս ուղղությունը Կասպից ծովում անվտանգության ապահովումն է, նավթագազային կարեւորագույն ենթակառուցվածքների եւ նավթամուղերի պահպանությունը։ Այդ նպատակով Ադրբեջանին են հանձնվել առափնյա ռադարներ, ամֆիբիա նավակներ եւ սարքավորումներ Կասպից ծովի ազգային հատվածի ամբողջական մոնիթորինգի համար, ասել Է դիվանագետը։

Մինչդեռ ամերիկացի դիվանագետը լռել է Կովկասում ԱՄՆ - ի կարեւորագույն գործընկեր Թուրքիայի եւ ՆԱՏՕ – ի մեծությամբ երկրորդ անդամ երկրի անմիջական մասնակցության մասին՝ Հայաստանի եւ Լեռնային Ղարաբաղի դեմ ագրեսիային մասնակցելու, Ադրբեջանին մահացու զենքի մատակարարման եւ վարձկանների տեղափոխման մասին։