Ռուսաստանցի փորձագետ․ Իրանի համար Հայաստանի տարածքով դեպի Սեւ ծով ելք ունենալը ծայրաստիճան կարեւոր նշանակություն ունի

Իրանի համար Հայաստանի եւ Վրաստանի տարածքով Սեւ ծովի ջրատարածք դուրս գալը ծայրաստիճան կարեւոր նշանակություն ունի։ Այդ մասին NEWS.am- ի թղթակցի հետ զրույցում հայտարարել է ռուսասատանցի փորձագետ, իրանագետ Կարինե Գեւորգյանը։

Նա հիշեցրել է Հայաստանի եւ Իրանի միջեւ ամենատարբեր հանգույցների կառուցման ծրագրերի մասին։

«Թեհրանն այդպիսի նպատակներ ունի, եւ այդ ուղղությամբ նա համագործակցում է Հնդկաստանի, ինչպես նաեւ Չինաստանի հետ, որը պատրաստ է 500 մլրդ դոլար ներդնել Իսլամական Հանրապետության բոլոր ենթակառուցվածքների (այդ թվում՝ տրանսպորտային ենթակառուցվածքի) զարգացման համար։ Կարծում եմ ՝ այդ բոլոր հանգույցները կզարգանան», – նշեց փորձագետը։

Գեւորգյանը վստահ է հայ-իրանական համագործակցության զարգացման անխուսափելիության հարցում։

«Համենայնդեպս, կարելի է խոսել գիտական փոխգործակցության մասին։ Հայաստանում դեռ շատ լուրջ գիտական դպրոցներ են պահպանվել մանրէաբանության, ֆիզիկայի, մաթեմատիկայի, ծրագրավորման, տեղեկատվական տեխնոլոգիաների և այլ ոլորտներում։ Թեհրանը, անկասկած, փոխգործակցելու է Հայաստանի հետ։ Իրանը արդիականացվող երկիր է, որը մահմեդական աշխարհի ամենաառաջադեմ պետություններից մեկն է՝ նույն Թուրքիայից առաջ անցնող։

Իրանում ընդգծված է կոռեկտ վերաբերմունքը բոլոր հայկական կազմակերպությունների եւ հուշարձանների նկատմամբ։ Հայկական բոլոր եկեղեցիներն ու վանքերը պահվում են պետության կողմից, վերակառուցվում, վերականգնվում եւ չեն վերագրվում ալբանական կամ իրանական ժառանգությանը, հայերին այդ ժառանգությունից զրկելու փորձեր չկան։ Այս յուրահատուկ սոցիալ-մշակութային քաղաքականությունն ուղղված է Իրանի հայ համայնքին, որը շատ լուրջ մաս է կազմում Իսլամական Հանրապետության ֆինանսա-տնտեսական վերնախավում», - հավելել Է նա