Վրաստանում ընկերությունը տուգանվել է հաշվապահի աշխատատեղի համար «բարձրահասակ եւ նիհար» կնոջ փնտրելու պատճառով

Վրաստանի աշխատանքի տեսչական ծառայությունը հաստատել է աշխատակիցներ հավաքող ընկերության կողմից նախապայմանագրային փուլում խտրականության կրկնվող դեպքերի փաստը։ Ընկերությունը տուգանվել է, հաղորդում է Georgia-online-ը։

Հաղորդվում է, որ, չնայած թափուր աշխատատեղի մասին առաջին հրապարակումից հետո նախազգուշացմանը, ընկերությունը կրկին խտրական բովանդակությամբ հայտարարություն է տեղադրել սոցցանցերում. «Պահանջվում է հաշվապահ՝ մինչեւ 50 տարեկան աղջիկ՝ լրիվ դրույքով։ Պահանջները՝ բարձրահասակ, նիհար, Fina ծրագրում փորձով, ձեռնարկությունում աշխատանքային փորձով: Խնդրում ենք ուղարկել Ձեր ինքնակենսագրականը սելֆիի հետ միասին մեր էլ. հասցեին»:

Տեսչությունից հայտնում են, որ գործատուն թափուր աշխատատեղը կատակ է անվանել ու ներկայացրել որպես առողջ ապրելակերպի քարոզման յուրօրինակ օրինակ։ Ծառայությունը, սակայն, ընդգծել է, որ խտրականությունն արգելված է ինչպես աշխատանքային, այնպես էլ նախապայմանագրային հարաբերություններում, այդ թվում՝ թափուր աշխատատեղեր տեղադրելու եւ աշխատողների ընտրության փուլում։ Խոսքն այն դեպքերի մասին է, երբ աշխատանքի ընդունման պայմանները չունեն օբյեկտիվ եւ ողջամիտ հիմնավորում։

Արդյունքում, Աշխատանքի տեսչական ծառայությունը եզրակացրել է, որ ընկերությունը խտրականություն է ցուցաբերում աշխատանք փնտրողների նկատմամբ՝ տարիքից, սեռից եւ արտաքինից ելնելով: Այդ կապակցությամբ ընկերությունը տուգանվել է երեք անգամ։ Բացի այդ, դրան հանձնարարվել է փոխել թափուր պաշտոնի հայտարարության տեքստը։