Իշխանությունները չեն հերքել Ադրբեջանի հետ տարածքների փոխանակման հնարավորությունը

Տարածքների հնարավոր փոխանակման հարցին պատասխանելու համար մենք պետք է անցնենք սահմանազատման եւ սահմանագծման ողջ գործընթացով։ Այս մասին Ազգային ժողովում ավանդական ճեպազրույցի ժամանակ նոյեմբերի 19-ին ասաց Արտաքին հարաբերությունների խորհրդարանական մշտական հանձնաժողովի ղեկավար, կառավարող «Քաղաքացիական պայմանագիր» խմբակցության պատգամավոր Էդուարդ Աղաջանյանը։

Լրագրողները մասնավորապես փորձում էին պարզաբանումներ ստանալ Հայաստանի վարչապետ Նիկոլ Փաշինյանի վերջերս արած հայտարարությունների առիթով։ Կառավարության ղեկավարն, օրինակ, նշել էր, որ ընթացիկ տարվա մայիսի 12-ից հետո Հայաստանի տարածքից մոտ 41 քառակուսի կիլոմետր հայտնվել է Ադրբեջանի ԶՈւ վերահսկողության տակ։ Ընդ որում՝ նա նշել էր, որ Առաջին ղարաբաղյան պատերազմից հետո նախկին Ադրբեջանական ԽՍՀ մոտավորապես նույնքան տարածք էլ հայտնվել էր հայկական կողմի վերահսկողության տակ։ Այս համատեքստում լրագրողները հետաքրքրվել են, թե կարող է արդյոք խոսք լինել տարածքների փոխանակման մասին։

Խորհրդարանական մեծամասնության ներկայացուցիչները, ըստ էության, չեն հերքել «տարածքների փոխանակման» հնարավորությունը սահմանազատման եւ սահմանագծման գործընթացի արդյունքում։

Այսպես, ըստ պատգամավորի, խոսքը աշխատանքների բավական մեծ ծավալի մասին է։

«Կարծում եմ՝ պատկերացնում եք, թե աշխատանքի ինչ ծավալ է ենթադրում այս գործընթացը։ Կարծում եմ, որ հանձնաժողովը, որը պետք է ձեւավորվի բավական երկարատեւ աշխատանքի արդյունքում, պետք է պատասխան տա այդ հարցին։ Ներկա պահին ես չեմ պատկերացնում, թե ինչ քարտեզներ են օգտագործվելու, եւ ինչ տրամաբանությամբ են ղեկավարվելու կողմերը։ Ինձ թվում է, որ այս փուլում այդ հարցը վաղաժամ է»,- ասաց Աղաջանյանը։