Նոր մանրամասներ Վրաստանում տեղի ունեցած վթարից տուժածների վիճակի մասին

Սեպտեմբերի 7-ին՝ ժամը 03:30-ի սահմաններում Վրաստանում՝ Մցխեթա-Ստեփանծմինդա-Լարս ավտոմոբիլային ճանապարհի 8-րդ կիլոմետրում տեղի ունեցած վթարի հետևանքով երեք տուժածները տեղափոխվել են Մցխեթայի բժշկական կենտրոններ: ՀՀ երեք քաղաքացիների վիճակը ծայրահեղ ծանր է:
«Երկու տուժածները՝ Անուշիկ Մալխասյանը և Ալինա Մինասյանը գտնվում են ծայրահեղ ծանր վիճակում: Նրանք երկուսն էլ կենսական նշանակության օրգանների վիրահատության են ենթարկվել, սակայն դեռևս բազմաթիվ վիրահատությունների կարիք կա: Նրանք միացված են արհեստական շնչառության սարքին: Ե՛վ երեխայի, և՛ աղջկա փայծաղները հանվել են: Ալինա Մինասյանի գլխում արյան զեղում կա, կատարվել է վիրահատություն: Բացի դրանից՝ ունի մի շարք վնասված օրգաններ ու բազմակի կոտրվածքներ: Կատարվել են այն վիրահատությունները, որոնք այս պահի դրությամբ փրկել են տուժողների կյանքը»,-հայտնեցին Մցխեթայի բժշկական կենտրոնից:
Բժշկուհին հայտնեց, որ ի տարբերություն Ալինա Մինասյանի, ում լյարդը կարվել է, երեխայի լյարդը չի վնասվել, սակայն նրանց կյանքին դեռ վտանգ սպառնում է, իսկ հետագա բժշկական գործողությունները կարվեն նրանց վիճակին համապատասխան:
Ինչ վերաբերում է Mercedes-Benz մակնիշի ավտոմեքենայի վարորդ՝ 1980 թվականին ծնված ՀՀ քաղաքացի Ռոման Հայրապետյանին, նա տեղափոխվել է Մցխեթայի հիվանդանոց:
Tert.am-ի հետ զրույցում հիվանդանոցի տնօրեն Ալեքսանդրե Գագավան ասաց, որ վարորդի վիճակը ծայրահեղ ծանր է. «Ռոման Հայրապետյանի վիճակը ծանր է, գտնվում է վերակենդանացման բաժանմունքում, միացված է արհեստական շնչառության սարքին: Նա հիվանդանոց ընդունվել է պոլիտրավմայով, մի շարք կոտրվածքներ ու վնասվածքներ ունի»:
Հիշեցնենք, որ սեպտեմբերի 7-ին՝ ժամը 03:30-ի սահմաններում Վրաստանում՝ Մցխեթա-Ստեփանծմինդա-Լարս ավտոմոբիլային ճանապարհի 8-րդ կիլոմետրում տեղի ունեցած վթարի հետևանքով մահացել է ազգությամբ հայ ՌԴ 2 քաղաքացի, որից մեկը՝ անչափահաս, վիրավորվել է ՀՀ 3 քաղաքացի: