Պատերազմը չի բացառվում Փաշինյանի մնալու դեպքում. քաղաքական անմեղսունակություն է խաղաղության դարաշրջան բացելու մասին խոսելը. Խամոյան
Մինչև 2018 թվականի իշխանափոխությունը որպես լրագրող աշխատած, իսկ 2018-ի իշխանափոխությունից հետո իշխանական պատգամավոր դարձած Արթուր Հովհաննիսյանը, Վահագն Հովակիմյանը, Թագուհի Ղազարյանը և Սարգիս Խանդանյանը հեղինակել են օրենքի նախագիծ, որով առաջարկել են փոփոխություն կատարել ԶԼՄ մասին օրենքում և հարակից մի շարք այլ օրենքներում։
«Քաղաքացիական պայմանագիր» կուսակցության պատգամավորների առաջարկած փոփոխությամբ՝ նախատեսվում է այսուհետև չնույնականացված աղբյուրին հղում անելիս հրապարակված նյութի համար պատասխանատավությունը թողնել բացառապես տվյալ նյութն արտատպած լրատվամիջոցի վրա, որովհետև, ինչպես հիմնավորում են իրենց տեսակետը նախագծի հեղիակները, չնույնականացված աղբյուրը գտնելն ու պատասխանատվության ենթարկելն անհնար է։
Առաջակվող մեկ այլ փոփոխությամբ՝ նախատեսվում է արգելել պետական կառույցներում լրատվամիջոցների հավատարմագրումը, եթե տարեսկզբից մինչև մարտ ամսվա ավարտը լրատվամիջոցը չի ներկայացրել իր ֆինանսական հաշվետվությունները և չի բացահայտել ֆինանսական հոսքերի աղբյուրները։
Նախագիծը հոկտեմբերի 28-ի ԱԺ քառօրյայի ավարտին ընդունվեց բացառապես «Քաղաքացիական պայմանագիր» կուսակցության 53 պատգամավորի կողմ ձայներով։
168 TV-ի «Ռեվյու» հաղորդաշարի եթերում ԱԺ «Հայաստան» խմբակցության պատգամավոր Ագնեսա Խամոյանը, խոսելով նման փոփոխությունները ծնող պատճառների մասին, նշեց՝ դրանք անհրաժեշտ էին բացառապես իշխանությանը։
«Այս օրենքի նախագիծը հետապնդում է բացառապես մեկ նպատակ՝ սահմանափակել լրատվամիջոցերի իրավունքները՝ ի հեճուկս իրենց արած հայտարարությունների, թե կողմ են մամուլի ազատությանը։ Իրականում 2018 թվականից այս իշխանությունն արել է ճիշտ հակառակը. բոլորս ենք հիշում, թե ինչպե՞ս էին լրատվամիջոցների ցանկ հրապարակում և ընթերցողի փոխարեն որոշում, թե ո՞վ, ի՞նչը, որտեղի՞ց կարդա՝ ձևավորելով իրենց համար լրատվամիջոցների սև ցուցակ, իսկ իրականում բացահայտելով իրենց բռնատիրական հակումները»,- ասաց պատգամավորը։
Ըստ նրա՝ իշխանական պատգամավորները խորհրդարան են բերել մի նախագիծ, որի վերաբերյալ չեն կարողացել ներկայացնել մի պարզ հիմնավորում և չեն կարողացել պատասխանել հարցին՝ եթե անգամ ԱԱԾ-ն չի կարողանում բացահայտել և նույնականացնել, օրինակ, այս կամ այն տելեգրամյան ալիքում հրապարակման աղբյուրը, լրատվամիջոցն այդ ինչպե՞ս է դա անելու։
«Գագիկ Սողոմոնյան անուն-ազգանունով օգտատիրոջը բացահայտելու համար մի ողջ հիմնարկ՝ ԱԱԾ-ն, աշխատեց, անգամ մարդիկ կալանավորվեցին, բայց արդյունքում չկարողացան բացահայտել, թե ո՞վ է կանգնած այդ անուն-ազգանունով օգտատիրոջ հետևում, ուստի նման դրույթով ընդամենը վերահսկելու են լրատվական հոսքերը և ոչ թե կանխելու ֆեյքնյուզի տարածումը։ Իսկ այն բացատրությունը, թե չնույնականացված աղբյուրը կարող է Ազգային անվտանգությանը սպառնացող լրատվություն հրապարակել, անիմաստ է, որովհետև ո՞վ է ասում, որ գրանցման տեղ և հասցե ունեցող լրատվամիջոցը չի կարող նման տեղեկություն հրապարակել, հետևապես, եթե իրեք պնդում են, թե ֆեյք լուրի դեմ են պայքարում, ապա այդ պայքարը տանելու համար պետք է ոչ թե լրատվամիջոցի, այլ հենց ֆեյքերի դեմ պայքարել»,- ասաց Խամոյանը՝ ընդգծելով՝ թեև նախագծի լրամշակված տարբերակից դուրս է հանվել արգելքը՝ անանուն աղբյուրներին հղում անելու՝ հասկանալով, որ անանուն աղբյուրի դեմ պայքարելով կարող են միջազգային խայտակառության առաջ կանգնել, իշխանական պատգամավորները ստիպված են եղել անանուն աղբյուր ձևակերպումը փոխարինել չնույնականացված աղբյուր ձևակերպումով, թեև իրենց նպատակը մնացել է նույնը։
«Նրանց իրական պայքարն անանուն աղբյուրների դեմ է, որոնց հղում անելով է կայացել Նիկոլ Փաշինյանը որպես լրագրող, խմբագիր, իսկ հետո՝ երկրի ղեկավար»,- ասաց պատգամավորը՝ հավելելով, թե Փաշինյանը քաջ գիտակցում է լրագրողների ուժը, օրենքի դրույթներով փորձել են հասնել նաև հնարավորինս քիչ հավատարմագրումների, այդ պատճառով էլ, ֆինանսական հաշվետվության հարցը բերել կապել են պետական համակարգում լրագրողին հավատարմագրել-չհավատարմագրելու հարցի հետ։
Խամոյանի փոխանցմամբ՝ այս սահմանափակումներն իրենց նպատակին չեն հասնելու, քանի որ որևէ իշխանության չի հաջողվել հաղթել մամուլի հետ ճակատամարտում կամ պատերազմում. չի՛ հաջողվելու նաև Փաշինյանին ու նրա իշխանությանը։
Ինչ վերաբերում է Փաշինյանի և նրա իշխանության դեմ ընդդիմության պայքարին, ապա ԱԺ «Հայաստան» խմբակցության պատգամավորը նշեց՝ այս հարցում աներկբա է՝ պայքարը հաջողության կարող է հասնել Ազգային ժողով+փողոցային պայքար բանաձևի արդյունքում։
«Մարդկանց պետք է բացատրել, թե ի՞նչ է տեղ ունեցել, և, որ ամենավտանգավորն է՝ ի՞նչ կարող է տեղի ունենալ, եթե այս իշխանությունը մնա։ Մենք խիստ կասկածներ և հիմնավոր մտահոգություն ունենք՝ եթե այս իշխանությունը մնա, ոչ միայն նոր պատերազմ կարող է լինել, այլ կարող ենք կորցնել մեր պետականությունը։ Փաշինյանը չի կարող բացել խաղաղության դարաշրջան, նա պարտված երկրի պարտված ղեկավար է։ Հիմա Հայաստանը՝ ի դեմ Փաշինյանի, բանակցությունների սեղանի վրա է, և աշխարհաքաղաքական խաղացողներն առևտուր են անում, թե ո՞ւմ ի՞նչ է հասնելու Հայաստանից, հետևապես՝ քաղաքական անմեղսունակություն է այս վիճակում ասել, թե՝ բացում եմ խաղաղության դարաշրջան»,- խոսքը եզրափակեց պատգամավորը։
Հարցազրույցի մանրամասները՝ տեսանյութում
Եվրամիությունը չի հասկանում Իրանում պատերազմի նպատակները. Կալաս
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Ղարաբաղից տեղահանվածները պետք է կապեն իրենց ապագան Հայաստանի հետ
Մարմնամարզության տղամարդկանց հավաքականը տուն է վերադառնում
Պետական արգելոցի ֆոտոթակարդները կրկին նկարահանել են կովկասյան ընձառյուծին
Ստեփանծմինդա-Լարս ավտոճանապարհը փակ է
Արսեն Զախարյանի տրանսֆերային արժեքն աճել է
Լոնդոնից գնված հայկական եկեղեցու փեղկն ու Արշիլ Գորկու գրաֆիկական աշխատանքն առաջիկա օրերին կցուցադրվ...