Ո՞ւմ մտքով է անցել, որ տոնը կարելի է խլել մարդուց․ Գեղամ Նազարյանի հարցը՝ Վահան Քերոբյանին

«Հայաստան» խմբակցության պատգամավոր Գեղամ Նազարյանը, դիմելով Էկոնոմիկայի նախարար Վահան Քերոբյանին, ասաց, որ իրեն խնդրել են բարձրացնել մեկ հարց՝ ո՞ւմ մտքով է անցել, որ տոնը կարելի է խլել մարդուց․

«Վերջին հաշվով Դուք նշեցիք, որ այս ամենն արվում է, որ մեր ժողովուրդն աշխատի, Դուք նկատե՞լ եք, որ մեր ժողովուրդը չափից ավել է աշխատում, մեր ժողովուրդն աշխատում է կիրակի օրերին շինհրապարակներում, տոնակնա օրերին՝ խանութներում , մեր ժողովուրդը հանգիստ, որպես այդպիսին, չունի։ Դեկտեմբերի 31-ից հունվարի 7-ն առիթ էր գոնե մի մասի համար՝ ընտանիքով հավաքվելու, միմյանց տեսնելու»,-ասաց Գեղամ Նազարյանը։ Շարունակելով միտքը՝ պատգամավորն ընդգծեց․

«ճի՞շտ է արդյոք այն պնդումը, որ այս ամենի նպատակն էր մոտիվ գտնել՝ հունվարի 7-ն աշխատանքային տոն հռչակելու, որովհետև մնացած բոլոր 4 տաղավար տոներին հաջորդած մեռելոց հիշատակի օրերը խլեցին, մնացել էր հունվարի 7-ը դա էլ խլեցիք»,-ասաց Գեղամ Նազարյանը։

Մանրամասները՝ տեսանյութում։

Հիշեցնենք՝ սեպտեմբերի 16-ի Կառավարության նիստում որոշում է ընդունվել «ՀՀ տոների և հիշատակի օրերի մասին» օրենքում փոփոխություններ կատարելու մասին։

Ըստ դրա՝ Ամանորի և Ծննդյան տոները նշվում են դեկտեմբերի 31-ից հունվարի 1-ը ներառյալ (Ամանոր) և հունվարի 6-ը (Սուրբ Ծնունդ և Հայտնություն)։ Այդ օրերը ոչ աշխատանքային կլինեն։

Իսկ հունվարի 2-ը, 3-ը, 4-ը, 5-ը և 7-ը աշխատանքային օրեր են սահմանվում։

Կառավարությունում կարծում են, որ օրենքի ընդունումը կապահովվի սոցիալ-տնտեսական և ֆինանսական համակարգերի բնականոն գործունեությունը, ինչը դրական ազդեցություն կունենա առևտրի, արդյունաբերության, ծառայությունների թողարկման ծավալի և այլ բնագավառների վրա։