Այլ իշխանության դեպքում այս պատերազմը չէր լինելու. Գեղամ Նազարյան

ՀՀ երկրորդ նախագահը շատ կարեւոր դիտարկումներ արեց պատերազմի վերաբերյալ, որ պատերազմը կարող էր չլինել, եթե չլինեին մի շարք գործողություններ ու հայտարարություններ: Այս մասին, այսօր՝ հոկտեմբերի 5-ին, ԱԺ-ում NEWS.am-ի հետ զրույցում նշեց «Հայաստան» խմբակցության պատգամավոր Գեղամ Նազարյանը:

«Ես սա կարեւորում եմ, որովհետեւ մինչեւ կհասնենք նրան, որ պատերազմը հնարավոր էր կանգնեցնել եւ այդպիսի մի քանի հնարավորություն եղել է, եղել է մեծ հնարավորություն, որ պատերազմ չլինի, բայց երկրի էս վարչախումբն իր առաջնորդի գլխավորությամբ ամեն ինչ արել է, որ մեր երկիր պատերազմ բերեն:

Բացի այդ ամեն ինչ արվել է, որ փորձ ունեցող մարդիկ, ռազմական գիտելիք ունեցող մարդիկ եւ լուրջ քաղաքական գործիչներ, որոնք կարող էին իրենց կապերով փոխել իրավիճակը, նրանք լսելի չլինեն: Հանրությունը թող պատասխանի հարցին, թե ինչու: Որովհետեւ եթե խնդիր դրված լիներ բեկում մտցնել, որ հաղթանակ տարվեր, ապա բոլոր կարծիքները պետք է լսելի լինեին, հատկապես այն մարդու, որի օրոք հաղթանակներ ենք գրանցել»,-ասաց նա:

Գեղամ Նազարյանի խոսքով, տեղի է ունեցել մեծագույն ողբերգությունը, որը չպետք է լիներ. «Այլ իշխանության դեպքում սա չէր լինելու: Լինի սա արկածախնդրություն, լինի ղեկավարի կոպիտ սխալներ, թե կոպիտ սխալներ, հետեւանքը նույնն է, երկու դեպքում էլ գործ ունենք աղետի հետ: Ես հանրությանը կոչ եմ անում ուշադիր լինել այս հարցում: Իշխող վարչախումբը տարածում է թեզը, որ ով էլ լիներ իշխանության, պատերազմն անխուսափելի էր: Բայց ես կրկնում եմ, որ այս պատերազմը չպետք է լիներ, եթե լիներ նորմալ իշխանություն, որը հասկանար տարածաշրջանում տեղի ունեցող զարգացումները, հասկանար ինչ է պետությունը եւ դրա ղեկավարումը»: