Անկարան պատասխանել է Մերկելի և Շուլցի հեռուստաբանավեճի ընթացքում Էրդողանի դեմ հնչած մեղադրանքներին

Թուրքիայի նախագահ Ռեջեփ Թայիփ Էրդողանի խոսնակ Իբրահիմ Քալընը մեկնաբանել է նախօրեին Գերմանիայի կանցլեր Անգելա Մերկելի և սպասվող ընտրություններում նրա գլխավոր մրցակից Մարտին Շուլցի հեռուստաբանավեճի ընթացքում Թուրքիայի նախագահի դեմ հնչած քննադատությունները:

Ինչպես գրում է թուրքական «Ջումհուրիյեթ» պարբերականը, Քալընը նշել է, որ գերմանացի պաշտոնյաներն իրենց խոսքում շեշտը դնելով Թուրքիայի և նախագահ Էրդողանի վրա՝ փորձում են շեղել ներքին լսարանի ուշադրությունը Եվրոպայում առկա լուրջ խնդիրներից:

«Պատահական չէ, որ նրանք շեշտը դնում են մեր նախագահի անվան վրա», - ասել է Քալընը:

Նա հայտարարել է, որ գերմանացի քաղաքական գործիչների նման քայլերը միայն կարող են վնաս հասցնել երկու հասարակություններին և սրել ազգայնական ու ռասիստական տրամադրությունները:

Նշենք, որ Թուրքիայում շարունակում է կալանավորված մնալ Գերմանիայի 55 քաղաքացի, նրանցից 12-ը՝ քաղաքական հայացքների պատճառով:

Կալանքի տակ գտնվող Գերմանիայի քաղաքացիների թվում կան նաև Ստամբուլի կղզիներում ձերբակալված իրավապաշտպաններ, ինչպես նաև գերմանական DW հեռուստառադիոընկերության Թուրքիայի թղթակից Դենիզ Յուջելը, որի արտահանձնման հարցում Թուրքիան շարունակում է համառել:

tert.am