Որքա՞ն է իրանա-ադրբեջանական պատերազմի հավանականությունը, եւ ո՞վ կարող է միջամտել. փորձագետ

Երբ նման լարվածություն է ստեղծվում (Իրանի եւ Ադրբեջանի միջեւ - խմբ.), առաջանում է այսպես կոչված «կատարողի էքսցեսի» վտանգ, եւ սկսում է զարգանալ զինված հակամարտության փուլը: Այս մասին NEWS.am-ի թղթակցի հետ հարցազրույցում ասաց ռուսաստանցի փորձագետ, իրանագետ Կարինե Գեւորգյանը:

«Դա կարող է տեղի չունենալ, սակայն նման դեպքերում ռիսկը չափազանց մեծ է: Հավանականությունը 50-50 է. «կատարողի էքսցես» հնարավոր է եւ՛ մի կողմից, եւ՛ մյուս կողմից: Ընդ որում, հակամարտությունն ակնհայտ է ինչպես դիվանագիտական, այնպես էլ քաղաքական մակարդակում: «Իսլամական հեղափոխության պահապանների կորպուսը» բացահայտ քննադատում է Ադրբեջանի պանթուրքացումը: Թեհրանը Ադրբեջանը դիտարկում է որպես Թուրքիայի կողմից գաղութացված տարածք եւ այս առումով կարծում է, որ Ադրբեջանը խաղալիք է դարձել ոչ միայն Թուրքիայի, այլեւ Իսրայելի ձեռքին: Թեհրանը հստակ գիտակցում է, որ Ադրբեջանը թույլ տվեց իրեն Իսրայելի գործիքը դարձնել՝ ընդդեմ Իրանի», - ընդգծեց փորձագետը:

Նա նկատեց, որ Իսրայելն իր հերթին նախատել է Իրանին, սակայն Բայդենի վարչակազմից մեծ աջակցություն չի ստացել. բացի այդ, ԱՄՆ-ը Վիեննայում բանակցություններ է վարում իրանական միջուկային ծրագրի շուրջ:

«Ամերիկյան կողմին քաջ ծանոթ է, որ, չնայած բոլոր մեղադրանքներին, իրանական կողմը կարող է ոչ խուլիգանական վարք դրսեւորել, ինչպես դա փորձում են ներկայացնել քարոզիչները, նա հետեւում է ձեռքբերված պայմանավորվածություններին: Համաձայնագիրը (իրանական միջուկային ծրագրի շուրջ – խմբ.), ըստ ամենայնի, կստորագրվի, ինչը շատ է նյարդայնացնում Իսրայելին, որը չունի մոբիլիզացիոն ռեսուրս, չունի բավականաչափ քանակությամբ հրթիռներ եւ սպառազինություն, որպեսզի փորձի իրականացնել ագրեսիվ գործողություններ Իրանի նկատմամբ», - պարզաբանեց Գեւորգյանը:

Ինչ վերաբերում է Թուրքիային, ապա հաշվի առնելով, որ Ադրբեջանում ոչ ֆորմալ կերպով ներկա են թուրքական Զինված ուժերը, ինչպես նաեւ տարբեր տիպի իսլամիստներ, ապա Անկարան, նրա գնահատմամբ, ուղղակիորեն չի միջամտի Բաքվի եւ Թեհրանի միջեւ հնարավոր զինված հակամարտությանը, այլ կփորձի դիվանագիտական ուղիներով կարգավորել այն:

«Ռազմական առումով Թուրքիան հազիվ թե միջամտի, հատկապես Պուտինի եւ Էրդողանի միջեւ վերջերս կայացած հանդիպումից հետո, որը շատ բան է հասկացրել: Ըստ երեւույթին՝ Անկարան չունի ռեսուրսներ, որպեսզի միջամտի այդպիսի հակամարտությանը: էրդողանը գնահատում է իր հնարավորություններն ու հասկանում՝ ինչ ռիսկերի կարող է դիմել: Իրանի հետ պատերազմն անհայտ արդյունքով արշավանք է: Ասադի այցը Մոսկվա եւ հաջորդիվ Թուրքիայի նախագահի խնդրած հրատապ հանդիպումը Պուտինի հետ ամեն ինչ հասկանալի է դարձնում: Այժմ մենք տեսնում ենք, որ Անկարան նահանջում է Իդլիբում, քանի որ, ըստ երեւույթին, փակ դռների հետեւում էրդողանին վերջնագիր է ներկայացված», - եզրափակեց փորձագետը: