Մերկելը կանցլերի պաշտոնի համար հեռուստաբանավեճում հաղթել է Շուլցին

Գերմանիայի կանցլերի պաշտոնի գլխավոր թեկնածուների միջև սեպտեմբերի 3-ին կայացած հեռուստաբանավեճում հաղթանակը գրանցել է գործող կանցլեր Անգելա Մերկելը, հայտնում է Deutsche Welle-ն:

Սոցիալ-դեմոկրատ Մարտին Շուլցի հետ հեռուստաբանավեճում ARD հեռուստաալիքի հեռուստադիտողները հաղթանակը շնորհել են քրիստոնյա-դեմոկրատների թեկնածու Անգելա Մերկելին:

ARD-ի պատվերով հանրային կարծիքի ուսումնասիրության Infratest-dimap ինստիտուտի անցկացրած հարցման արդյունքներով՝ հարցման մասնակիցների 55 տոկոսը նախընտրությունը տվել է Մերկելին, 35 տոկոսը՝ Շուլցին:

Նշվում է, որ Մերկելին առաջին անգամ է հաջողվել հեռուստաբանավեճերում հաղթել նման մեծ տարբերությամբ:

Ընդհանուր առմամբ, հարցման մասնակիցների 49 տոկոսը Մերկելին անվանել է վստահության ավելի արժանի, իսկ Շուլցին այդպիսին է համարում 29 տոկոսը:

Հիշեցնենք, որ Բունդեսթագի ընտրությունները կայանալու են սեպտեմբերի 24-ին: