Ուկրաինա-ԵՄ ասոցացման համաձայնագիրն ուժի մեջ է մտել

Ուկրաինայից ագրարային եւ արդյունաբերական արտադրանքի առանձին տեսակների արտահանման համար ԵՄ-ի լրացուցիչ ժամանակավոր առեւտրային արտոնությունները ուժի մեջ են մտնում սեպտեմբերի 1-ից, որի գործողությունը հաշվարկված է 3 տարվա համար, հայտնում է «Ուկրաինա.ռու»-ն:

«2017 թվականի սեպտեմբերի 1-ը այն օրն է, որն ընդմիշտ կմտնի Ուկրաինայի պատմության մեջ: Այսօր ամբողջ ծավալով ուժի մեջ է մտնում Ուկրաինայի եւ ԵՄ-ի միջեւ ասոցացման համաձայնագիրը»,- Facebook-ի իր էջում գրել է Ուկրաինայի նախագահ Պյոտր Պորոշենկոն: Նրա խոսքով՝ 2016 թվականի հունվարի 1-ից Ուկրաինայում գործում է Եվրամիության հետ ազատ առեւտրի խորացված գոտին: «Այս տարվա 6 ամիսների ընթացքում ԵՄ երկրների հետ Ուկրաինայի ապրանքների եւ ծառայությունների արտաքին առեւտուրն աճել է 22 տոկոսով: Մեր առեւտրի գրեթե 40 տոկոսը բաժին է ընկնում հենց Եվրամիությանը: Տեղի է ունեցել ուկրաինական արտահանման աշխարհագրական կառուցվածքի պատմական փոփոխություն հօգուտ ԵՄ երկրներում դրա ծավալների մեծացման: Սա ԵՄ շուկային Ուկրաինայի տնտեսության ինտեգրման արդեն անշրջելի գործընթաց է»,- հավելել է Պորոշենկոն:

Ուկրաինայի եւ ԵՄ-ի միջեւ ազատ առեւտրի գոտին գործարկվել է 2016 թվականին եւ նախատեսում է ԵՄ մատակարարվող ուկրաինական ապրանքների 40 տեսակի քվոտաներ, որոնց մեծ մասը ագրարային արտադրանք են: Քվոտաների շրջանակում մատակարարումներն իրականացվում են արտոնյալ սակագներով, իսկ քվոտաներից բարձր՝ ընդհանուր: