Գունագեղ միջոցառումը ոչ թե սպիի բուժում է, այլ վերքին աղ լցնել է. քաղաքացիները՝ սեպտեմբերի 21-ի միջոցառումների մասին

Երեկ կառավարության նիստում Նիկոլ Փաշինյանը հայտնեց, որ անկախության 30-ամյակը կնշվի մասշտաբային ու գունագեղ տոնակատարությամբ:

«Այս տարի ՀՀ անկախության 30-ամյակն է, և մեզ հայտնի հանգամանքների բերումով մեր տրամադրությունը տոնական համարել չի կարելի, բայց մենք որոշում ենք կայացրել, որ ՀՀ անկախության 30-րդ տարեդարձը պետք է պատշաճ ձևով նշվի: Եվ ուզում եմ ասել, որ սեպտեմբերի 21-ին Երևանի Հանրապետության հրապարակում տեղի է ունենալու մասշտաբային և գունագեղ տոնակատարություն, և այդ տոնակատարությունը, իհարկե, առաջին հերթին նվիրված է լինելու ՀՀ անկախության, ինքնիշխանության, անվտանգության և Արցախի համար իրենց կյանքը զոհած մեր նահատակների հիշատակին»,- հայտարարել էր Նիկոլ Փաշինյանը:

Հանրության զգալի մասը Փաշինյանի հայտարարությունը ոչ միանշանակ ընդունեց: Հատկապես սոցիալական ցանցում հայտնվեցին տարատեսակ մեկնաբանություններ, այդ թվում՝ նաև քննադատություն կառավարության կայացրած որոշման վերաբերյալ: Իսկ զոհերի ծնողներից շատերը ֆլեշմոբի ձևով նշում էին, որ տղաների հիշատակը հարգելու բավական սխալ տարբերակ է ընտրել կառավարությունը:

168.am-ի նկարահանող խումբն այսօր Արաբկիր վարչական շրջանում անցկացրած հարցման ընթացքում փորձեց լսել քաղաքացիների դիրքորոշումը Փաշինյանի հայտարարության, նահատակների հիշատակին գունագեղ տոնակատարություն իրականացնելու վերաբերյալ: Պետք է ընդգծել, որ հարցման ընթացքում մեզ հանդիպած քաղաքացիների ընդամենը 10%-ը պատրաստակամություն հայտնեց պատասխանել մեր հարցերին: Մյուսները կա՛մ ուշանում էին, կա՛մ շտապում, կա՛մ պարզապես խուսափում էին խոսել տեսախցիկի առաջ:

Հարցմանը պատասխանած քաղաքացիների մի մասը ողջունում էր Փաշինյանի հայտարարությունը, պատրաստակամություն էր հայտնում սեպտեմբերի 21-ին լինել Հանրապետության հրապարակում, մյուսներն այն համարում էին «վերքի վրա աղ լցնել»:

Հարցին, թե ինչպես են վերաբերվում սեպտեմբերի 21-ին նաև Արցախի համար իրենց կյանքը զոհած նահատակների հիշատակին նվիրված միջոցառում անցկացնելու կառավարության որոշմանը և գունագեղ տոնակատարությամբ անցկացնելու Փաշինյանի հայտարարությանը, քաղաքացիներն այսպես էին արձագանքում.

«Չեմ կարող պատասխանել, չգիտեմ՝ ինչ պատասխանեմ, ճիշտն ասած»:

«Ի՞նչ ասեմ, չեմ կարող այդ հարցին պատասխանել: Ղեկավարությունը ոնց հարմար է գտնում, տենց էլ անում է, ժողովուրդն ինչ պետք ա ասի… Ես չեմ կարում, որ նենց ճոխ տոնահանդես կլինի, երևի ինչ-որ… ժողովրդին հուսահատությունից հանելու համար պետք ա ինչ-որ մի բան կազմակերպեն՝ վշտից դուրս բերելու համար»:

«Ես կհամարեի դա ճիշտ՝ զոհերի համար»:

«Գիտեք՝ ինչ ասեմ: Եթե չեն անում ինչ-որ մի տոնակատարություն, ասում են՝ «վայ, չարեցին, և այլն», անում են՝ բողոքում են՝ «հիմա սուգ ա, ինչի եք անում»: Երկընտրանքի մեջ են մարդկանց գցել: Համենայն դեպս, ես շատ եմ ցավում զոհված երեխաների համար, շատ, շատ եմ ցավում, ես չեմ կարող պատասխանել այդ հարցին: Եթե ասեմ՝ թող անեն, նրանց ծնողները… եթե ասեմ՝ մի արեք, ինչ, կյանքը շարունակվում է: Բայց չգիտեմ»:

«Շատ վատ եմ վերաբերվում»:

«Մեզ դա պետք ա: Թե տխրության տերն ենք, ուրեմն ժողովուրդը պիտի մի քիչ էլ իրեն ուրախ ձևավորի, որ կարողանա էս բոլորին դիմակայել… Բացասաբար չարժի մտածել, որովհետև մեր զոհերի արժեքն ենք ցածրացնելու: Ինչի՞ համար պիտի զոհերի մասին վատ բան մտածենք: Մենք պիտի ավելի բարձրացնենք դրանով: Ոչ թե մենք գնում ենք ուրախության, ուրախանալու, հրճվելու»:

«Ի՞նչ գունագեղ տոնախմբություն: Բնական է՝ անկախության օրն է, բայց ո՛չ տոնախմբություն, ո՛չ գունագեղ: Զոհերի հիշատակին այնքան հարցեր ունենք լուծելու, որ տոնախմբության ժամանակը չի: Հիմա ի՞նչ տոնախմբություն: Շուշին, Հադրութը, գերիները ու… տոնախմբությո՞ւն»:

«Զոհերի հիշատակը կարելի է ոչ թե տոնախմբությամբ նշել, մենք միշտ էլ իրենց հիշում ենք, իրենք մեր հոգում են, մեր սրտում են: Բայց չեմ պատկերացնում՝ դա ինչպես կարելի է հրավառությամբ նշել: Ես գտնում եմ, որ դա սխալ է»:

«Ճիշտ ա ասել Փաշինյանը, լրիվ համամիտ եմ իր հետ»:

«Ընդհանրապես տոնը կնշանակի՝ ժողովուրդը, մեծամասնությունը ուրախ է, ինչ-որ առիթ ունի: Մենք ոչ մի առիթ չունենք: Անկախության տոնը մենք վաղուց սահմանները մկրատով կտրելով, ուրիշներին նվիրելով ենք նշում: Եթե այդ նշումը կա, այս նշումն անիմաստ է»:

«Անպայման, անպայման պետք է բոլորը գնան»:

«Դրական եմ վերաբերվում»:

«Ես գտնում եմ, որ դրա ժամանակը չի, որովհետև այդ վերքը, որը կա, դեռ չի սպիացել: Ու գունագեղ միջոցառումը ոչ թե սպիի բուժում է, այլ վերքի վրա աղ լցնել է»:

«Շատ ճիշտ է»,- ասաց մի քաղաքացի, ապա հարցին, թե արդյո՞ք լինելու է այդ օրը հրապարակում, արձագանքեց՝ «Այո, այո»:

Մանրամասները՝ 168.am-ի տեսանյութում