Գյումրիում ՏԻՄ ընտրությունների առաջադրումների գործընթացը մեկնարկել է. թեկնածուների հարցով քննարկումներ են ընթանում

Գյումրիում սեպտեմբերի 2-ին մեկնարկել է ՏԻՄ ընտրությունների առաջադրումների գործընթացը:

NEWS.am-ի հետ զրույցում ԿԸՀ քարտուղար Արմեն Սմբատյանն ասաց, որ դեռ որեւէ կուսակցություն եւ դաշինք իրենց թեկնածուների ցանկը չի ներկայացրել։

Մեզ հետ զրույցում «Հայաստան» խմբակցության անդամ Գեղամ Մանուկյանն ասաց, որ թեկնածություն առաջադրելու մասին քննարկում դեռ չի եղել։ Նա առաջարկեց ենթադրություններ չանել եւ սպասել իրենց որոշմանը։

«Քաղաքացիական պայմանագիր» խմբակցության անդամ Հովիկ Աղազարյանն էլ նշեց, որ տեղեկություն չունի, թե ովքեր են թեկնածուները. «Չունեմ տեղեկատվություն, բայց անկասկած կառաջադրվի թեկնածու»։

Անդրադառնալով մամուլում շրջանառվող այն լուրը, որ Շիրակի գործող մարզպետ Հովհաննես Հարությունյանն է Գյումրու քաղաքապետի թեկնածուն, Աղազարյանն ասաց. «Լսել եմ, տարբեր շրջանակներ բոլոր հավանական տարբերակներն ասում են, բայց դա չպետք է համարել պաշտոնական բան»։

Հարցին՝ արդյոք ինքը տեղյա՞կ է, որ ՔՊ-ական Նազելի Բաղդասարյանն էլ ցանկացել է իր եղբորն առաջադրել քաղաքապետի թեկնածուի համար, Աղազարյանն ասաց, որ առաջին անգամ է լսում։

«Վերածնվող Հայաստան» կուսակցությունից մեզ հայտնեցին, որ կուսակցությունը կունենա մասնակցություն Սյունիքի բոլոր համայնքներում անցկացվող ընտրություններում, մասնավորապես՝ Գորիսում։ Այս պահին միայն քննարկումներ են ընթանում ձեւաչափի վերաբերյալ։

ԲՀԿ-ական Արման Աբովյանն էլ ասաց, որ թեկնածու առաջադրելու առնչությամբ քննարկումներ են ընթանում, հստակ որոշում դեռ չունեն։

Մամուլում նաեւ լուրեր են շրջանառվում, որ ՀՀԿ-ն մասնակցելու է միայնակ, քաղաքապետի նրա թեկնածուն ԱԺ նախկին պատգամավոր Արտյոմ Ղուկասյանն է՝ ԱԺ նախկին պատգամավոր, Գյումրու նախկին քաղաքապետ Վարդան Ղուկասյանի հորեղբոր որդին։

Նշենք, որ Գյումրիում ՏԻՄ ընտրությունները համամասնական ընտրակարգով են անցակցվելու, այսինքն՝ ընտրվում են տվյալ կուսակցության կամ կուսակցությունների դաշինքի ավագանու անդամները: Իսկ քաղաքապետի թեկնածուներ հանդիսանում են տվյալ կուսակցության կամ կուսակցությունների դաշինքի ցուցակի առաջին համարը զբաղեցնողները: Առաջադրումների համար ժամանակ է հատկացված սեպտեմբերի 2-ից 12-ը՝ 18:00, իսկ հետո արդեն գրանցման գործընթացն է սկսվելու: Ընտրական օրենսգիրքը հստակեցնում է, թե ովքեր չեն կարող Գյումրիի ավագանու անդամի թեկնածուներ լինել: Քարոզչությունը կսկսվի սեպտեմբերի 22-ին եւ կտեւի մինչեւ հոկտեմբերի 15-ը ներառյալ։