Հունաստանը չի կարող դեպի Եվրամիություն դարպաս դառնալ աֆղանստանցիների համար
Հունաստանը չի կարող դեպի Եվրամիություն դարպաս դառնալ աֆղանստանցիների համար, ովքեր փախել են իրենց հայրենիքում հակամարտության սրումից, հայտարարել է միգրացիայի նախարար Նոտիս Միտարաչին՝ կոչ անելով ԵՄ-ին միասնական պատասխան տալ ճգնաժամին, հայտնում է Reuters-ը:
«Մենք հստակ հայտարարում ենք, որ չենք լինելու եւ չենք կարող դեպի Եվրոպա դարպաս լինել փախստականների եւ միգրանտների համար, որոնք կարող են փորձել գալ Եվրամիություն»,- ERT պետական հեռուստատեսությանն ասել է Միտարաչին:
Նա կրկնել է ԵՄ-ի միասնական արձագանքի կոչերը, քանի որ աֆղանստանցի ապաստան հայցողների արտաքսման հարցում ԵՄ միասնականությունն անցած շաբաթ փլուզվել էր:
Հունաստանը հայտնվել էր եվրոպական միգրացիոն ճգնաժամի առաջնագծում 2015 թվականին, երբ Սիրիայում, Իրաքում եւ Աֆղանստանում հակամարտություններից փախած գրեթե մեկ միլիոն մարդ ժամանել էր իր կղզիներ՝ նախքան հյուսիսում եվրոպական ավելի հարուստ երկրներ ուղեւորվելը: