El Pais. ՆԱՏՕ-ի պատմության մեջ առաջին անգամ դաշինքի գլխավոր քարտուղար կարող է կին դառնալ

ՆԱՏՕ-ի պատմության մեջ առաջին անգամ կինը կարող է դաշինքի գլխավոր քարտուղար դառնալ՝ 2022 թվականի հոկտեմբերին այս պաշտոնում փոխարինելով նորվեգացի Յենս Ստոլտենբերգին: Ինչպես հաղորդում է իսպանական El Pais թերթը՝ վկայակոչելով դիվանագիտական ​​աղբյուրները, նոր գլխավոր քարտուղարը կընտրվի ՆԱՏՕ-ի գագաթնաժողովին, որը նախատեսված է հաջորդ գարնանը Մադրիդում:

Ինչպես պարզաբանում է պարբերականը, կազմակերպության ներսում կա լայն կոնսենսուս, որպեսզի այս պաշտոնում կին փոխարինի Ստոլտենբերգին: ՆԱՏՕ-ի ապագա գլխավոր քարտուղարի որոնման շուրջ բանակցությունները կսկսվեն աշնանը, սակայն դաշինքի անդամ տարբեր երկրներում արդեն հնչում են ենթադրյալ հավակնորդների անունները: «Ընդհանուր կարծիք կա, որ եկել է ժամանակը, որպեսզի կին ղեկավարի ՆԱՏՕ-ն»,- դիվանագիտական ​​աղբյուրներին մեջբերում El Pais-ը, փոխանցում է ՏԱՍՍ-ը:

Ըստ պարբերականի՝ դաշինքի գլխավոր քարտուղարի պաշտոնի հավանական թեկնածուների թվում են Մեծ Բրիտանիայի նախկին վարչապետ Թերեզա Մեյը, ԵՄ դիվանագիտության նախկին ղեկավար Ֆեդերիկա Մոգերինին, Գերմանիայի պաշտպանության նախարար Աննեգրետ Կրամպ-Կարենբաուերը: Հավանական թեկնածուներ են նաև Լիտվայի նախկին նախագահ Դալիա Գրիբաուսկայտեն, Էստոնիայի նախագահ Կերստի Կալյուլայդը և Խորվաթիայի նախկին նախագահ Կոլինդա Գրաբար-Կիտարովիչը:

Յենս Ստոլտենբերգը ՆԱՏՕ-ի գլխավոր քարտուղար է 2014 թվականի հոկտեմբերի 1-ից: Այս տարի ՆԱՏՕ-ի խորհուրդը վերջին անգամ երկարաձգեց նրա պայմանագիրը մեկ տարով: Նոր գլխավոր քարտուղարի ընտրությունը սովորաբար տեղի է ունենում ՆԱՏՕ-ում՝ դաշինքի առաջատար երկրների միջեւ փակ խորհրդակցությունների շրջանակներում, որոնցում վերջնական խոսքը Միացյալ Նահանգներինն է: Ապա այդ նշանակումը պաշտոնապես հաստատվում է Հյուսիսատլանտյան խորհրդի կողմից: