Թուրքիայում նշել են պայմանը, որով Ղրիմը կճանաչեն Ռուսաստանի մաս

Ռուսաստանը եւ Թուրքիան կարող են պայմանավորվել Ղրիմի կարգավիճակի հարցում, եթե Մոսկվան անկախ պետություն ճանաչի Հյուսիսային Կիպրոսի Թուրքական Հանրապետությունը (ՀԿԹՀ)։ Այս մասին «Լենտա.ռու»-ի հետ զրույցում ասել է Մալթեփեի թուրքական համալսարանի պրոֆեսոր Հասան Ունալը։

Նա կոչ է արել Ռուսաստանին դառնալ ՀԿԹՀ-ի ճանաչման շարժման առաջատարը, քանի որ միավորման դեպքում Կիպրոսը կարող է մտնել ՆԱՏՕ կազմի մեջ, ինչը չի համապատասխանում Մոսկվայի շահերին։

«Պարտադիր չէ, որ Ռուսաստանը միանգամից ճանաչի հանրապետությունը. բավական է չխանգարել, որ դա անեն մյուս երկրները, որոնք գտնվում են նրա ուղեծրում, եւ սկսեն ուղղակի առեւտուր Հյուսիսային Կիպրոսի հետ»,- բացատրել է Ունալը։

Մասնագետի խոսքով՝ այդ դեպքում Թուրքիան կհրաժարվի Ղրիմը Ուկրաինայի տարածք ճանաչելու հայտարարություններից, իսկ տեղի ավիաընկերությունները կվերսկսեն ուղիղ չվերթները դեպի թերակղզի։

Այսպիսի պլանը կարող է անիրականանալի թվալ Ղրիմի եւ Կիպրոսի հարցերում երկու երկրների դիրքորոշումների պատճառով, նշել է պրոֆեսորը։ «Բայց մի մոռացեք, որ քաղաքական գործիչներն օգտագործում են հռետորաբանությունը, որպեսզի հետո ավելի ուժեղ դիրք զբաղեցնեն բանակցությունների դեպքում»,- ամփոփել է նա։