Ջուրն ընկած Boeing 737 բեռնատար ինքնաթիռի անձնակազմը փրկվել է
Հոնոլուլուի մոտակայքում ջուրն ընկած Boeing 737 բեռնատար ինքնաթիռի երկու օդաչուները փրկվել են: Այս մասին հայտնել է CNBC-ն՝ հղում կատարելով ԱՄՆ դաշնային ավիացիոն վարչությանը:
«ԱՄՆ դաշնային ավիացիոն վարչությունը եւ Տրանսպորտային անվտանգության ազգային խորհուրդը կքննեն միջադեպը», - ասվում է գերատեսչության հայտարարության մեջ:
Վարչության տվյալներով՝ դեպքը տեղի է ունեցել տեղի ժամանակով առավոտյան 02:30-ին: Օդաչուները հայտնել են շարժիչի անսարքության մասին եւ փորձել են վերադառնալ Հոնոլուլու, սակայն ստիպված են եղել օդանավը իջեցնել ջրի վրա:
Նշվում է, որ նման բեռնատար ինքնաթիռները հաճախ գործում են մի քանի տասնամյակ, իսկ մինչ այդ՝ օգտագործվում են ուղեւորափոխադրման համար:
Ավելի վաղ հաղորդվել էր, որ աղետը տեղի է ունեցել Կալաելոա օդանավակայանից մոտ երկու մղոն հեռավորության վրա: