Պուտինը հանձնարարել է կազմակերպել աշխատանքային միգրանտների պատվաստումը
Մինչեւ հունիսի 30-ը կառավարությունը պետք է ապահովի օտարերկրացիների համար կորոնավիրուսի դեմ վճարովի պատվասումների հնարավորությունը: Համապատասխան հանձնարարականը տվել է նախագահ Վլադիմիր Պուտինը, հաղորդում է ՌԲԿ-ն:
Մինչեւ հուլիսի 15-ը կառավարությունը նաեւ պետք է կազմակերպի COVID-19-ի դեմ պատվաստումն աշխատանքային միգրանտների համար՝ որոշելով համապատասխան միջոցառումները ֆինանսավորելու աղբյուրները:
Հունիսի սկզբում Պուտինը հանձնարարել էր կառավարությանը կարգավորել օտարերկրացիներին, այդ թվում՝ աշխատանքային միգրանտներին պատվաստելու հարցը:
Փոխվարչապետ Տատյանա Գոլիկովայի խոսքով՝ նախ իշխանությունները կքննարկեն այն աշխատանքային միգրանտներին եւ օտարերկրացիներին պատվաստելու հնարավորությունը, որոնք արդեն գտնվում են Ռուսաստանում: Երկրում նաեւ դիտարկում են աշխատանքային միգրանտների պարզեցված մուտքի հարցը նրանց պարտադիր պատվաստումով, ասել է փոխվարչապետ Մարատ Խուսնուլինը: