Բայդենը կկործանի մեր տնտեսությունն եւ մեր երկիրը. Թրամփ
ԱՄՆ նախկին նախագահ Դոնալդ Թրամփը կտրուկ քննադատության է ենթարկել նախագահ Ջո Բայդենի տնտեսական քաղաքականությունը, ինչպես նաեւ Ռուսաստանի եւ Չինաստանի, եւ «Հյուսիսային հոսք-2» գազատարի բացման կապակցությամբ նրա դիրքորոշումը, հաղորդում է Washington Examiner-ը:
«Բայդենը պատրաստվում է կործանել մեր տնտեսությունն եւ մեր երկիրը: Բայդենը չեղարկել է Keystone XL ամերիկյան խողովակաշարն ու դրա 48 հազար աշխատատեղերն ամերիկացիների համար, սակայն նա հաստատել է Եվրոպայում ռուսական խողովակաշարը: Ես դադարեցրել են Եվրոպայում խողովակաշարը, ես նրանց նկատմամբ պատժամիջոցներ եմ սահմանել: Սակայն ես լավ հարաբերություններ ունեմ Պուտինի հետ, եւ դա հրաշալի է»,-ասել է Թրամփը Օհայոյում հանրահավաքի ժամանակ:
ԱՄՆ նախկին նախագահը նաեւ անդրադարձել է Ռուսաստանի հետ հարաբերություններին՝ ընդգծելով, որ ԱՄՆ-ն փորձում է պաշտպանել Գերմանիային Ռուսաստանից՝ չնայած այն «միլիոնավոր դոլարներ է վճարում Մոսկվային խողովակաշարի համար»:
«Նա [Անգելա Մերկելը] ինձ դուր է գալիս, սակայն նա կոշտ է, խելացի եւ օգտագործում է ԱՄՆ-ին: Ես ասել եմ. «Անգելա, մենք պաշտպանում ենք ձեզ երկրից, որին դուք վճարում եք միլիարդներ»: Նա պարզապես ժշտացել է: Նա գիտի»,-հավելել է Թրամփը:
Նա ընդգծել է, որ ԱՄՆ-ն հասել է ամերիկյան էներգետիկ անկախության, սակայն դրան եւս վերջ կտրվի: Թրամփն անվանել է համաշխարհային ասպարեզում Բայդենի դիրքորոշումը «ոչ հմուտ»՝ մեղադրելով նրան, որ վերջինս զիջում է Չինաստանին: «Ջո Բայդենը վատնում է դժվարությամբ ձեռքբերված հարգանքը՝ խոնարհվելով Ամերիկայի թշնամիներին եւ դնելով մեր երկիրն անհարմար դրության մեջ միջազգային ասպարեզում»,-ասել է նա: