Ճակատագրական համբույր. բրիտանացի նախարարը հրաժարական է տվել
Բրիտանիայի առողջապահության նախարար Մեթ Հենքոքը հրաժարական է տվել, հաղորդում է ВВС-ն:
«Ավելի վաղ Sun պարբերականը հրապարակել է Հենքոքի եւ նրա վաղեմի ընկերուհի Ջինա Քոլադանջելոյի լուսանկերը համբուրվելիս: Երկուսն էլ ընտանիք եւ երեխաներ ունեն: Սակայն խոսքը ոչ այնքան դավաճանության մասին է, որքան այն, որ դա տեղի է ունեցել առողջապահության նախարարի հետ համավարակի ընթացքում»,-նշվում է հրապարակման մեջ: Համավարակի ընթացքում Հենքոքը բազմիցս ասել է, որ թագավորության քաղաքացիները պետք է պահպանեն սոցիալական հեռավորություն, հատկապես հանրային տարածքներում: Ընդ որում՝ Հենքոքն ու Քոլադանջելոն համբուրվել եւ գրկախառնվել են, ըստ ամենայնի, նախարարության գրասենյակում այս տարի:
«Ես հասկանում եմ, թե ինչպիսի մեծ զոհողություններ է արել յուրաքանչյուրն այս երկրում, եւ մեզնից նրանք, ովքեր սահմանում են այդ կանոնները, պետք է պահպանեն դրանք: Ուստի ես պետք է հրաժարական տամ»,-ասել է Հենքոքը: «Ամենաքիչը կցանկանայի, որ իմ անձնական կյանքն ուշադրությունը շեղեր եւ խոչընդոտեր մեր կենտրոնացմանը դեպի մեր գլխավոր նպատակը՝ այս ճգնաժամից դուրս գալը: Ես ներողություն եմ խնդրում, որ խախտել եմ կանոնները, ես ներողություն եմ խնդրում իմ ընտանիքից եւ մտերիմներից, որ ենթարկել եմ նրանց այդ փորձության: Բացի այդ, այս պահերին ես պետք է լինեմ երեխաներից հետ»,-ասված է հրաժարականի մասին Հենքոքի հայտարարության մեջ, որը նա ուղարկել է վարչապետ Բորիս Ջոնսոնին:
Առողջապահության նախարարի պաշտոնում նշանակվել է Սաջիդ Ջավիդը, որը 2019-2020 թվականներին զբաղեցրել է ֆինանսների նախարարի պաշտոնը, իսկ մինչ այդ աշխատել է ներքին գործերի նախարարի պաշտոնում: