Բուդդայական մանտրաներ, իսլամական դամբարաններ եւ մարջանե հուշարձաններ են գտել Մալդիվներում

Երկու տարվա ընթացքում աշխարհի տարբեր երկրների հետազոտողների խումբն ուսումնասիրում էր Մալդիվյան արխիպելագի կղզիները Հնդկական օվկիանոսում։ Ֆոտոգրամետրիայի եւ լիդարային սքանավորման օգնությամբ ուսումնասիրվել է ավելի քան հարյուր հիսուն կղզի ավելի քան հազար կղզիներից, հայտնաբերվել են մինչ այժմ անհայտ մոտ 5 հազար օբյեկտ եւ արվեստի նմուշ, տեղեկացնում է Planet- today-ը՝ հղում կատարելով Antiquity-ին։

Գիտնականներին բախտ է վիճակվել հայտնաբերել մի քանի ուրույն գտածոներ, այդ թվում՝ հողի տակ։ Հենց լիդարի օգնությամբ գրանցվել է մինչպատմական բուդդայական տաճարային համալիր, ընդ որում՝ նրա որոշ շինություններ բացվել էին դեռեւս 99 տարի առաջ։ Դրանից ոչ հեռու փորագրված մարջանե քար կար։ Գիտնականները մի կողմից այն նույնացրել են տեղի հնագույն Կալա աստվածության հետ, մյուս կողմից՝ սանսկրիտով փորագրված էր գրություն, որը նույնականացվել է որպես բուդդայական մանտրա։

Մյուս կղզում գիտնականներին հաջողվել է մանրամասն ուսումնասիրել արխիպելագի հնագույն գերեզմանատեղին։ Այստեղ նրանք հայտնաբերել ենն ավելի քան մեկուկես հազար մարջանե եզակի շիրմաքարեր, մի քանի մզկիթներ, ինչպես նաեւ մուսուլման սրբի դամբարան, որը, ըստ ավանդույթի, այստեղ էր բերել իսլամը 800 տարի առաջ։

Էլի մի կղզում խոր բլուրի տակ հնագետները նույնականացրել են բուդդայական եւս մեկ տաճար։ Հետաքրքիր է, որ դրա շուրջ գտնվող ավելի ուշ շերտերում հայտնաբերվել են առաջին մզկիթներն ու մուսուլմանների գերեզմաններ։ Դա թույլ է տվել գիտնականներին ավելի շատ բան իմանալ այս շրջանի բնակիչների կրոնական նախասիրությունների ժամանակագրության մասին։