Իվանիշվիլի. Գեորգի Գախարիայի գործողությունները դավաճանություն էին նրա թիմի եւ պետության հանդեպ

Իշխող «Վրացական երազանք» կուսակցության հիմնադիր եւ նախկին նախագահ, միլիարդատեր Բիձինա Իվանիշվիլին այս տարվա հունվարին քաղաքականությունից հեռանալու մասին հայտարարությունից հետո առաջին անգամ հանդես է եկել քաղաքական իրադարձության մեկնաբանությամբ՝ նա խոսել է այն մասին, որ Գեորգի Գախարիան հրաժարական է տվել վարչապետի պաշտոնից, լքել է իշխող կուսակցությունը եւ ձեւավորել սեփականը:

Իվանիշվիլին իր հայտարարության մեջ կտրականապես հերքել է այն ենթադրությունները, թե Գախարիայի կուսակցությունը իր «քաղաքական նախագիծն» է, եւ ընդգծել է, որ նախկին վարչապետի հետ համագործակցությունն իր համար անընդունելի է: Նա նաեւ այս տարվա փետրվարին վարչապետի պաշտոնից Գախարիայի հեռանալը համարել է «դավաճանություն թիմին», գրում է «Նովոստի-Գրուզիան»:

«Երբ բարձրաստիճան պաշտոնյան այս պատրվակով դեմ է դուրս գալիս օրենքի գերակայությանը եւ հեռանում է պաշտոնից, դժվար է պատկերացնել սրանից ավելի լուրջ քաղաքական հանցագործություն: Ցավով ուզում եմ նշել, որ այս ամենը ինձ մեծ հիասթափություն է պատճառել:

Այս ամենի տրամաբանական շարունակությունն է դարձել Գեորգի Գախարիայի կողմից քաղաքական կուսակցության հիմնադրումը: Նրա կուսակցությունը չունի գաղափարական կամ հայեցակարգային հիմք եւ ակնհայտորեն ընկալվում է որպես իրավիճակային գործիք՝ իշխող թիմից գոնե փոքր թվով ձայներ խլելու համար»: