Ֆրանսիայի ազգային ֆինանսական դատախազությունը Լիբանանի ԿԲ ղեկավարի գործողությունների հետաքննություն է սկսել

Ֆրանսիայի ազգային ֆինանսական դատախազությունը սկսել է Լիբանանի կենտրոնական բանկի կառավարչի փողերի լվացման գործունեության նախնական հետաքննությունը, հայտնում է AP-ն:

Ֆրանսիայի այս քայլը նախաձեռնվել է մի քանի ամիս անց այն բանից, երբ Շվեյցարիան հետաքննություն է սկսել Լիբանանի կենտրոնական բանկում փողերի հնարավոր լվացման եւ հափշտակությունների վերաբերյալ:

Ֆրանսիացի դատախազությունը հայտնել է, որ մայիսի վերջին հետաքննություն է սկսել Ռիադ Սալամեի հանդեպ՝ փողերի հավանական լվացման եւ կազմակերպված հանցավոր խմբավորման հետ կապերի մեղադրանքներով:

70-ամյա Սալամեն, որը շուրջ երեք տասնամյակ ղեկավարում էր Լիբանանի կենտրոնական բանկը, երկար տարիներ համարվում է փոքր երկրում դրամավարկային կայունության խորհրդանիշ: Բայց 2019-ին Լիբանանն ընկավ իր տնտեսական եւ ֆինանսական վատթարագույն ճգնաժամի մեջ: Լիբանանյան ֆունտը, որն ավելի քան 20 տարի շարունակ դոլարի հետ կապվում էր 1515-ի մակարդակում, այժմ «սեւ շուկայում» վաճառվում է գրեթե 13 000-ով:

Ցուցարարները այժմ Սալամեին՝ Merrill Lynch-ի նախկին ներդրումային բանկիրին «գող» են անվանում: Բեյրութում նրա գրասենյակի մոտ բազմիցս բողոքի ցույցեր են անցկացվել տեղական արժույթի փլուզման եւ տնտեսության անկման ֆոնին, որը նախորդ տարի գերազանցել էր 20%-ը:

Հունվարին Շվեյցարիայի գլխավոր դատախազը, առանց լրացուցիչ մանրամասներ հաղորդելու, հայտնել էր, որ խնդրել է Լիբանանին համագործակցել Կենտրոնական բանկի հետաքննության հարցում: Անհասկանալի է նաեւ, թե ինչն է պատճառ հանդիսացել շվեյցարական հետաքննության համար: