ՌԴ-ում միգրանտներին պարտավորեցրել են իմանալ ռուսերեն եւ պատմություն
Կառավարությունը հաստատել է ռուսերենի, պատմության եւ ռուսական օրենսդրության հիմքերի իմացության նվազագույն մակարդակի պահանջները օտարերկրյա աշխատողների համար։ Փաստաթուղթը հրապարակվել է իրավական տեղեկատվության պաշտոնական ինտերնետ-պորտալում։
Այսպես, միգրանտները պետք է ազատ խոսեն սոցիալ-կենցաղային եւ որոշ մասնագիտական թեմաների մասին։ Մասնավորապես, դա վերաբերում է աշխատանքի ընդունվելուն, խորհրդատվությանը հիվանդանոցում եւ ոստիկանությանը դիմելուն։ Նրանց պարտավորեցրել են նաեւ իմանալ լրացնել անհրաժեշտ փաստաթղթերը եւ հայտարարությունները։
Ռուսաստանի պատմության քննությունը հանձնելիս ստուգում են օտարերկրացի հայցորդի՝ կարեւոր իրադարձությունների, խոշոր քաղաքների անունների եւ գլխավոր պետական տոների իմացությունը։ Բացի այդ, երկրի տարածք մտնելիս նրանք պետք է ծանոթանան իրենց հիմնական իրավունքներին, ազատություններին եւ պարտականություններին։
Այս պահանջները, որոշ բացառություններով, վերաբերում են նաեւ նրանց, ովքեր ծրագրում են միայն ժամանակավորապես ապրել Ռուսաստանում։