Աննա Սեմենովիչի տեսահոլովակի նկարահանումներն ավարտվել են ծեծկռտուքով

Լրագրողները կռվի են բռնվել «Блестящие» խմբի նախկին մեներգչուհի Աննա Սեմենովիչի տեսահոլովակի նկարահանումների ժամանակ՝ փորձելով լուսանկարել նրան։ Այս մասին հաղորդում է «Комсомольская правда»-ն։

Սեմենովիչը փորձել է հանդարտեցնել վեճ հրահրող տղամարդկանց՝ ասելով. «Բոլորդ ողջ եւ առողջ եք։ Տղաներ, հաշտվեք, ներողություն խնդրեք միմյանցից։ Դա արեք հանուն ինձ»։

Ծեծկռտուքից հետո դեպքի վայր է ժամանել ոստիկանությունը, նշում է «КП»-ն։ Իրավապահ մարմինների աշխատակիցներին կանչել է ծեծկռտուքի մասնակիցներից մեկը։ Մամուլի ներկայացուցիչները հաշտվել են, իսկ միջադեպի արդյունքում ոչ ոք չի տուժել։

Երգչուհին հայտնվել է նկարահանման հրապարակում հարսնացուի կերպարով, իսկ բուն տեսանյութը նկարահանվել է Իզմայլովսկի կրեմլի ֆոնին։ Արտիստուհու խոսքով՝ իր տեսահոլովակում նա հանդես կգա հարսանեկան փերու կերպարով, որը միավորում է սիրող սրտերը։