Մալթան եւ Ռուսաստանը կուսումնասիրեն երկրների միջեւ զբոսաշրջության վերականգնման հնարավորությունը
Մալթայի արտաքին գործերի եւ Եվրոպայի գործերի նախարար Էվարիստ Բարտոլոն Սոչիում Ռուսաստանի արտաքին գործերի նախարար Սերգեյ Լավրովի հետ կքննարկի երկրների միջեւ զբոսաշրջության վերականգնման հարցը, տեղեկացնում է ՏԱՍՍ-ը։
«Առաջնահերթ կլինեն Ռուսաստանի եւ Մալթայի երկկողմ հարաբերությունները։ Ես կարծում եմ, որ մենք կարող ենք բավական բարելավել մեր հարաբերությունները, հատկապես առեւտրի եւ տուրիզմի ոլորտներում։ Մենք պետք է վերականգնենք տուրիզմը»,- ասել է Բարտոլոն ռուսաստանցի պաշտոնակցի հետ հանդիպումից առաջ։
Մալթայի արտգործնախարարության ղեկավարը հիշեցրել է, որ Ռուսաստանը եւ Մալթան դադարեցրել են ակտիվ զբոսաշրջությունը համավարակի պատճառով, բայց Վալետան շահագրգռված է, որպեսզի որքան հնարավոր է շուտ վերականգնվեն զբոսաշրջային հոսքերը Ռուսաստանից՝ ոլորտում աշխատանքային զբաղվածության խթանման նպատակով։ «Տուրիզմը շատ կարեւոր է մեր տնտեսության, մեր մարդկանց համար։ Մեր բնակչության մոտ 16 տոկոսն աշխատում է զբոսաշրջային ոլորտում, մեր տնտեսության 30 տոկոսն ուղղակիորեն կախված է տուրիզմից։ Ուստի, մեզ համար տուրիզմի վերականգնումն ու ամրապնդումը շատ կարեւոր են,- նշել է նախարարը։- Զբոսաշրջային այդ շուկան սկսել է լավ զարգանալ։ Ավելի մեծ թվով զբոսաշրջիկներ են սկսել գալ Մալթա։ Եվ մենք կցանկանայինք վերականգնել այն։ Մենք ցանկանում ենք ուղիղ չվերթներ ունենալ Մալթայի եւ Ռուսաստանի միջեւ»։