Հանրապետականները բողոքում են Ներկայացուցիչների պալատում դիմակ կրելու պահանջի դեմ

Հանրապետականները բողոքում են Ներկայացուցիչների պալատում դիմակ կրելու պահանջի դեմ, ինչը խորացնում է լարվածությունը դեմոկրատների մեծամասնության հետ հարաբերություններում, որոնք հրաժարվում են փոխել կանոնները առողջապահության դաշնային պաշտոնյաների թարմացված ցուցումներից հետո։

Հանրապետական փոքրամասնության առաջնորդ Քեւին Մակքարտին գլխավորել է պատվաստված օրենսդիրներին եւ աշխատակիցներին, երբ նրանք գտնվում են Ներկայացուցիչների պալատում եւ կոմիտեների նիստերի դահլիճներում, առողջապահության վարչության կողմից դիմակ կրել տալու պարտադրանքը չեղարկելու փորձը։

Օրենսդիրները կարող են դիմակները հանել ելույթների ժամանակ, բայց մնացած ընթացքում պետք է լինեն դիմակներով։ Սենատում դիմակի կրման նման պահանջ չկա։

Դեմոկրատ օրենսդիրներն ասում են, որ իրենք էլ են հոգնել դիմակ կրելուց, բայց անհանգստացած են, որ իրենց հանրապետական գործընկերներից ոմանք հրաժարվել են պատվաստվելուց եւ կարող են տարածել վիրուսը։

Որոշ հանրապետական կոնգրեսականներ գերադասել էին դիմակ չկրել երեքշաբթի օրվա քվեարկության ժամանակ։ Նրանց անհնազանդությունը կարող է թանկ արժենալ։ Դիմակ կրելուց հրաժարված օրենսդիրները կարող են տուգանվել 500 դոլարով առաջին խախտման համար։ Հաջորդ խախտումները կհանգեցնեն 2500 դոլար տուգանքի։ Գործնականում, սակայն, Ներկայացուցիչների պալատը սահմանափակվում է նախազգուշացմամբ առաջին խախտման համար։

Associated Press-ի տվյալներով՝ յոթ օրենսդիր կստանա նման նախազգուշացումներ, եւս երեքն արդեն ստացել է նախազգուշացում եւ կտուգանվի 500 դոլարով։

Մակքարտին ընդունել է բողոքի բանաձեւ, որում ասվում է, որ դիմակներ կրելու մանդատը «խոչընդոտում է պալատի՝ հավուր պատշաճի եւ արդյունավետորեն գործերը վարելու կարողությանը»։

Բանաձեւում ասվում է, որ նրանք, ովքեր չեն պատվաստվել, «իրական սպառնալիք չեն ներկայացնում պատվաստվածների համար»։

Դիմակների դեմ ապստամբությունը Ներկայացուցիչների պալատում հասունանում է մի քանի ամիս, որոշ հանրապետականներ դժգոհ են անվտանգության հավելյալ միջոցներից, որոնք մտցվել են համավարակի ժամանակ եւ խստացվել հունվարի սկզբին Կապիտոլիումի մերձակայքում բախումներից հետո։

Որոշ հանրապետականների բողոքներ այժմ ավելի բարձրաձայն են հնչում, երբ CDC-ն փոխել է դիմակներ կրելու կանոնները՝ հայտարարելով, որ պատվաստված մարդիկ կարող են դիմակ չկրել եւ սոցիալական հեռավորություն չպահել։

CDC հանձնարարականներում ասվում է, որ բոլոր մարդիկ պետք է դիմակ կրեն մարդկանցով լի տարածքում, ինչպիսին են ինքնաթիռները, ավտոբուսները, հիվանդանոցները եւ բանտերը։ Օրենսդիրները եւ Կապիտոլիումի մյուս անդամները դադարել են դիմակ կրել շենքում տեղաշարժվելիս։