Նեթանյահուն Իսրայելի նախարարների կաբինետի հետ կքննարկի հրադադարի ռեժիմը Գազայում
Իսրայելի վարչապետ Բենիամին Նեթանյահուն հինգշաբթի տեղական ժամանակով 19:00-ին կառավարության նիստ է նշանակել՝ անվտանգության հարցերի քննարկման համար, հաղորդում է ՏԱՍՍ-ը՝ վկայակոչելով իսրայելական հեռուստատեսության 13-րդ ալիքը:
Հեռուստաալիքի տվյալներով՝ հանդիպման ընթացքում կքննարկվեն Գազայի հատվածում օպերացիաները շարունակելու նպատակահարմարությունը եւ հրադադարի ռեժիմի հնարավորությունը:
Գազայի հատվածում պաղեստինյան արմատական խմբավորումների եւ իսրայելական բանակի միջեւ հրթիռային հարվածներով փոխանակումները չեն դադարում մայիսի 10-ից: Դրանք հետեւել են Արեւելյան Երուսաղեմի Ալ-Աքսա մզկիթում տեղի ունեցած անկարգություններին, որոնք բռնկվել էին Շեյխ Ջարահ թաղամասում այնտեղ ապրող արաբ ընտանիքներից տների առգրավման մասին Իսրայելի դատարանի որոշման պատճառով: Վերջին տվյալների համաձայն՝ իսրայելական կողմից զոհվել է առնվազն 12 մարդ, իսկ պաղեստինյան կողմից ՝ ավելի քան 250 մարդ: