Jerusalem Post. Թուրքիան հակաիսրայելական հռետորաբանությամբ գերազանցում է Իրանին

Վերջին ութ օրվա ռազմական գործողությունների ընթացքում Թուրքիան կտրուկ ուժեղացրել է իր հակաիսրայելական հռետորաբանությունը: Իսրայելի ու հրեաների դեմ հռետորաբանությունն այնպիսի բարձունքների է հասել, որ ԱՄՆ-ը դատապարտել է Թուրքիայի նախագահին հակասեմական մեկնաբանությունների համար: Մինչ ԱՄՆ-ն աշխատում է Իսրայելի դեմ ՀԱՄԱՍ-ի պատերազմը դադարեցնելու ուղղությամբ, Թուրքիան բորբոքում է կրակը, հայտնում է Jerusalem Post-ը:

«Վերջին հայտարարությունների շարքում կարելի է նշել Երուսաղեմը Իսրայելից անջատելու Թուրքիայի պահանջը»,- ասվում է հոդվածում:

«Այնուհետեւ Թուրքիան դատապարտել է Ավստրիային՝ Իսրայելին սատարելու համար: Էրդողանը պնդում է, որ Ավստրիան «փորձել է մահամեդականներին ստիպել վճարել հրեաների համար, որոնց իրենք ցեղասպանության են ենթարկել»: Փաստարկն այն է, որ Ավստրիան ինչ-որ կերպ պատժել է մահմեդականներին Հոլոքոստի համար: Այնուհետեւ Թուրքիան Իսրայելն անվանել է «ահաբեկչական պետություն»: Նախկինում՝ 2019-ին, Թուրքիայի նախագահը Իսրայելը համեմատել էր նացիստական Գերմանիայի հետ: Այն ժամանակ Թրամփի վարչակազմը եւ Պետդեպարտամենտի նրա անդամները, որոնք թրքամետ դիրքորոշում ունեին, չէին դատապարտում այս մեկնաբանությունները: ԱՄՆ ներկայիս վարչակազմը փոխվել է, եւ Անկարան «կանաչ լույս» չի ստացել ՀԱՄԱՍ-ին տեղակայելու ու Իսրայելին հարվածելու համար, ինչպես նախկինում»:

Թուրքիայի նախագահի այլ մեկնաբանությունների թվում է խաղաղության կոչը` «Ալ-Քուդսի դեմ ագրեսիան» դադարեցնելու համար: Նա պնդում է, որ եթե աշխարհը չկանգնեցնի Իսրայելին, ապա վաղը այդ «դաժան մտածելակերպը» ուրիշներին կվնաս կպատճառի:

Թուրքիայի կառավարող AKP կուսակցության ղեկավարության մեկնաբանությունները ներկայացված են նաեւ Թուրքիայի ուլտրաաջ լրատվամիջոցներում։ Yena Safak թերթը, որը սպասարկում է Թուրքիայի աջ պոպուլիստների շահերը եւ մոտ է ռեժիմին, Թուրքիային կոչ է արել գլխավորել իսլամական դաշինքը՝ Իսրայելի վրա հարձակվելու համար։ Դաշինքի մեջ կմտնեն Թուրքիան, Իրանը, Կատարը, Մալայզիան եւ Պակիստանը, երկրներ, որոնք կամ աջակցում են ՀԱՄԱՍ-ին, կամ մոտ են Մուսուլման եղբայրներին։ Անցած շաբաթ Թուրքիան խորհրդակցել է Իրանի հետ այն մասին, թե ինչպես դիմակայեն Իսրայելին, եւ Թուրքիան կոչ է արել Հռոմի պապին ու մյուսներին աջակցություն հայտնել Իսրայելի դեմ պատժամիջոցներին։

«Իսրայելի դեմ Թուրքիայի հռետորաբանության համեմատ Իրանի հռետորաբանությունը համեմատաբար ցածրաձայն էր։ Թուրքիան ամենահակաիսրայելական երկրներից մեկն է դարձել աշխարհում, եւ նրա մշտական հակաիսրայելական հռետորաբանությունը, որը սնուցվում է պետության կողմից վերահսկվող լրատվամիջոցների միջոցով, եւ որոնցում հրապարակվում են ամենաահավոր հոդվածներն Իսրայելի մասին, հակասեմականություն է բորբոքում Թուրքիայում եւ արտասահմանում»,- նշում են հոդվածի հեղինակները։