Պետք է դադարեցնել որևէ քննարկում կոմունիկացիաների ապաշրջափակման հետ կապված, քանի դեռ չի վերադարձել վերջին ռազմագերին. Զոհրաբյան

ՌԴ նախագահի հետ հանդիպմանը վերջապես Նիկոլ Փաշինյանը բարձրացրեց գերիների հարցը, բայց, չգիտես ինչու, նա խուսափեց ռազմագերի ձևակերպումը տալուց և օգտագործեց պահված անձիք արտահայտությունը: Այստեղ լրջագույն տարբերություն կա, եթե օգտագործվում է ռազմագերի տերմինը, ավտոմատ կերպով գործում է Ժնևի 3-րդ կոնվենցիան, որն էլ իմպերատիվ կերպով պարտադրում է երկրիներին կրակի դադարեցումից հետո, բոլորը բոլորի դիմաց սկզբունքով վերադարձնել ռազմագերիներին: Այս մասին «Փաստինֆո»-ի հետ զրույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը:

«Ես չհասկացա՝ ինչու՞ Փաշինյանը ձեռնպահ մնաց ռազմագերի եզրույթն օգտագործելուց, բայց այն, որ գերիների հարցը Պուտինի հետ հանդիպմանը բարձրացվեց, սա կարևոր է մեզ համար, որովհետև Ադրբեջանը կատեգորիկ հրաժարվում է նրանց ճանաչել ռազմագերի, ինչպես նաև Եվրոպայի և Մարդու իրավունքների Եվրոպական դատարանը բազմիցս դիմել է Ադրբեջանին՝ պահանջելով իրենց մոտ պահվող հայ ռազմագերիների թվի և նրանց վիճակի մասին տեղեկատվություն, սակայն Ադրբեջանը կատեգորիկ հրաժարվել է Եվրոպական դատարանին որևէ տեղեկատվություն տրամադրել, ինչի արդյունքում ԵԴ-ն դիմել է Եվրոպայի խորհրդի նախարարների կոմիտե»,-ասաց Զոհրաբյանը հավելելով, որ հայ ռազմագերիների հարցը այս պահին գտնվում է ԵԽ նախարարների կոմիտեում և նախարարների կոմիտեն է նաև ներգրավված այս գործընթացում:

Պատգամավորը ընդգծեց, որ Հայաստանը որքան մեծացնի միջազգային ճնշումը Ադրբեջանի վրա, այնքան կմեծանան շանսերը, որ մենք ռազմագերիների հարցը կկարողանանք լուծել:

Մեր այն դիտարկմանը՝ եթե Հայաստանն արձանագրում է, որ Ադրբեջանը խախտել է համաձայնագրի 8-րդ կետը, չի վերադարձնում գերիներին, ինչու՞ չի դիմում Եվրոպայի խորհուրդ կամ միջազգային այլ ատյաններ՝ պահանջելով սանկցիա կիրառել Ադրբեջանի նկատմամբ, պատգամավորն արձագանքեց.

«Այստեղ ավելի հեշտ լուծում կա, քանի դեռ Ադրբեջանը չի կատարում համաձայնագրի 8-րդ կետը, Հայաստանը պետք է հրաժարվի 9-րդ և մնացած կետերի կատարումից, այսինքն՝ կոմունիկացիան չպետք է ապաշրջափակվի, Սյունիքով-Նախիջևանով Ադրբեջանին կապ ապահովելու ցանկացած գործընթաց իմպերատիվ կերպով պետք է դադարեցվի մինչեւ վերջին ռազմագերին և գերեվարված քաղաքացիական անձը չվերադառնա Հայաստան կամ Արցախ, որովհետև գերիների թվում կան նաև քաղաքացիական անձինք, մեր տեղեկություններով նրանց թվում նաև երեք կին: Պետք է դադարեցնել որևէ քննարկում կոմունիկացիաների ապաշրջափակման հետ կապված և որպես նախապայման դնել ռազմագերիների հարցը, որը համաձայնագրի 8-րդ կետով ամրագրված է: Պետք է Ադրբեջանին ասել, քանի դեռ դուք 8-րդ կետը չեք կատարել, գերիներին չեք վերադարձրել, թռնել 9-րդ կետին և խոսել կոմունիկացիաների ապաշրջափակման մասին անհեթեթություն է: Ցավոք, դա չի արվում»,-ասաց Զոհրաբյանը:

Վերջինս նաև հայտնեց, որ այս պահին բազմաթիվ դիմումներ կան թե՛ ՀՀ-ի կողմից, թե՛ առանձին անձանց կողմից՝ իրենց անհետ կորած և գերեվարված որդիների հետ կապված, Եվրոպական դատարանում ՀՀ կառավարության ներկայացուցիչը ևս դիմում ներկայացրել է:

Պատգամավորի դիտարկմամբ՝ Հայաստանը այս առումով շատ պասիվ է օգտագործում Սփյուռքի ռեսուրսը:

«Սփյուռքում ունենք հարգարժան մարդիկ, որոնք ԵՄ անդամ տարբեր երկրների կառավարություններում ունենա շատ լուրջ լծակներ:

Պետք է կարողանանք այդ մարդկանց հետ ճիշտ և գրագետ աշխատել: Մեր դեսպանատները շատ դեպքերում մատնված են անգործության և ընդամենը պրոտոկոլային նամակներ են հղում Եվրոպական կառույցներ: Մեր դեսպանատները Եվրոպական կառույցներում ժամանակ չպետք է ունենային, պետք է թակեին Եվրոպական պառլամենտի, ԵԽԽՎ անդամ բոլոր պատգամավորների դռները, հանդիպեին, քննարկումներ, կազմակերպեին, պետք է ցուցադրեին այն զարհուրելի կադրերը, որ մենք ամեն օր տեսնում ենք ադրբեջանական սոցիալական մեդիայում, թե ինչպիսի դաժան և անմարդկային վերաբերմունքի են ենթարկվում հայ ռազմագերիները: Այն աշխատանքը, որ պետք է արվեր , իհարկե, արվում է, բայց արվում է կիսաթոքերով, ամբողջ թոքերով մենք չենք տեսնում այդ աշխատանքը, իսկ այդ կերպ մենք չենք կարողանալու այս զգայուն և կարևոր խնդիրը լուծել»,-ասաց Նաիրա Զոհրաբյանը:

Զոհրաբյանը խոսքով՝ եթե Հայաստանը իր ողջ ռեսուրսն օգտագործի միջազգային հանրության վրա դրական առումով ճնշում գործադրելու համար, արդյունքն ակնհայտ կլինի.

«Քանի դեռ Ադրբեջանը տեսնում է մանեվրելու, նոյեմբերի 10-ից հետո գերեվարվածներին որպես ահաբեկիչներ և դիվերսանտներ ներկայացնելու դաշտ, շարունակելու է իր գործելաոճը: Ինձ համար հասկանալի չեն այն խաղաղասիրական կոչերը, որ հնչում են իշխանական տարբեր պատգամավորների և պաշտոնյաների կողմից: Ես սա համարում եմ անարգանք անհետ կորածների, ռազմագերիների և մեր զոհված զինվորների հանդեպ: Ալիևը շարունակում է իր հակահայկական հռետորաբանությունը , իսկ այդ ընթացքում հայկական կողմից խաղաղության կոչեր են հնչում»,-ասաց Զոհրաբյանը:

Իսկ թե ինչու՞ դեռևս գերիները չվերադարձած հայկական կողմը շտապում է քննարկել մեկ այլ համաձայնագիր, Զոհրաբյանը հորդորեց այդ հարցով դիմել Նիկոլ Փաշինյանին. «Ես չգիտեմ ՝ ինքն ինչ փաստաթուղթ է քննարկել: Կարծում եմ, եթե ինքը որևէ նոր բան ստորագրի առանց ռազմագերիների վերադարձի՝ ես կհիասթափվեմ, եթե այդ դեպքում ևս հանրության զգալի շարունակի պահել այն քար լռությունը և անտարբերությունը, որը հիմա է պահում:

Հայկական կողմն ունի լիարժեք բոլոր իրավունքները, որպես միջազգային իրավունքի սուբյեկտ, որպես ԵԽ անդամ,դիմել միջազգային տարբեր ատյաններ»,-մեզ հետ զրույցում ասաց պատգամավորը: