Ոչ մի հարցի չեք պատասխանում. մարզերից ավտոբուսներով երթի եկածներին համակարգողներն արգելում էին շփվել լրագրողների հետ

Նիկոլ Փաշինյանի կազմակերպած հանրահավաքի, ապա երթի ավարտին մարզերից եկած քաղաքացիներ երթի ավարտից հետո իրենց բնակավայրեր վերադարձան Շահումյանի հրապարակում կայանած ավտոբուսներով, բոլորը՝ BusVoyage ընկերության, կամ միանման միկրոավտոբուսներով։

Յուրաքանչյուր ավտոբուսի ուղևորների համար մեկական համակարգող կար, որոնք թույլ չէին տալիս ուղևորներին շփվել լրագրողների հետ։

Մարտունեցիներին տեղափոխող ավտոբուսի համակարգողը, նկատելով, որ NEWS.am-ի նկարահանող խումբը զրուցում է ուղևորների հետ, միջամտեց՝ ասելով. «Ոչ մի հարցի չեք պատասխանում»։

Իջևանցիներին համակարգող տղամարդն էլ, որը, ի դեպ, դպրոցի աշխատակից էր, նախ վստահեցրեց, որ յուրաքանչյուրից հազար դրամ են հավաքել միկրոավտոբուսը վարձելու համար, իսկ հետո մյուս ուղևորներին հուշում էր, որ նույն պատասխանը տան։

Հիշեցնենք, որ երեկվանից լրատվամիջոցներում, թելեգրամյան ալիքներում և սոցցանցերում տեղեկություններ էին տարածվում այն մասին, որ իշխանությունը ակտիվ վարչական ռեսուրս է օգտագործում Փաշինյանի աջակցության հանրահավաքին բազմամարդություն ապահովելու համար։ Ըստ տեղեկությունների՝ մարզային իշխանություններին հանձնարարվել էր համայնքապետերի և դպրոցի տնօրենների միջոցով ապահովել իրենց բնակչության առավելագույն մասնակցություն։ Մասնավորապես՝ թելեգրամյան ալիքներում հայտնվել են սա ապացուցող ձայնագրություններ։ Այսօր էլ լրատվամիջոցների հետ զրույցում մարզերից եկած քաղաքացիները խոստովանել են, որ իրենց ավտոբուսներով են բերել մայրաքաղաղաք, նրանցից մեկը նույնիսկ ասել է, որ ավտոբուսն իրենց տներից է վերցրել։

Արարատի մարզի Ուրցաձոր համայնքի ղեկավար Ռաֆիկ Անդրեասյանը ֆեյսբուքյան իր էջում տեսանյութեր է հրապարակել այն մասին, թե ինչպես են «Սպայկա» ընկերության աշխատակիցներին միկրոավտոբուսներով և ավտոբուսներով բերում Երևան՝ Փաշինյանի հանրահավաքին մասնակցելու համար։