«Բա-ով սկսվող բոլոր բառերն իրենց մեջ ունեն ոչխարային ինչ-որ բան». Վահրամ Սահակյան

Սցենարիստ Վահրամ Սահակյանն այսօր Բաղրամյան պողոտայում՝ ընդդիմության հանրահավաքի ժամանակ դիմելով ներկաներին, ասաց, որ առաջին անգամ է նման բեմից խոսում և հիշեցնելով իր հեղինակած «Մեա կուլպա» ստեղծագործությունը՝ նշեց, որ պատերազմից հետո դաշտ նետվեցին օրակարգեր, որոնց անդրադառնալն ինքնին տանում է մեղքի։

«Օրակարգ մտցնելով նման հարցեր, ինչպես, օրինակ՝ բա ո՞վ լինի, բա ո՞վ է լինելու, բա այն ժամանակ ինչո՞ւ էիք… ուզում եմ ասել, որ «բա»-ով սկսվող բոլոր բառերն իրենց մեջ ունեն ոչխարային ինչ-որ բան։ Բոլորդ գիտեք, որ ես երբեմն մի քիչ կոպիտ բառեր եմ նախընտրում, բայց, օրինակ, վերջին շրջանում ես ինձ թույլ չեմ տալիս վիրավորել այլակարծիք մարդկանց, երբեք մարդկանց ժեխ չեմ անվանի»,- նշեց Վահրամ Սահակյանը։

Ըստ նրա, պատերազմից հետո հաճախ է հնչում այն հարցադրումը, թե՝ բա ինչո՞ւ դու սահմանին, դիրքերում չես, հետևաբար, եթե մի խելացի մարդ այդ հարցին պատասխանի, պետք է ասի՝ «պատերազմն ավարտվել է, այ իդիո՛տ»։

«Բայց մենք իրավունք չունենք նման հարցերի պատասխանելու, մենք ժամանակ չունենք։ Շատ անգամ եմ լսում, որ ասում են, թե՝ մեզ խաբեցին, սևի ու սպիտակի բաժանեցին… Ի՞նչ էիր դու, որ քեզ բաժանեցին, թող այդ բաժանող չոբանը գնա զարգացած երկիր և փորձի որևէ մեկին բաժանել սևի ու սպիտակի, փորձի ու կտեսնի, թե իր հետ ինչ կկատարվի»,- հավելեց նա։