Կա՛մ Փաշինյանի ղեկավարությամբ ՀՀ-ն գլորվում է անդունդը, ոչնչացվում է, կա՛մ գնում է նրան հեռացնելու ճանապարհով և փորձում է ուղղել կոտրված ողնաշարը

Նիկոլ Փաշինյանն ԱԺ արտահերթ ընտրություններ անցկացնելու հայտարարությունն արեց պարզ պատճառով․ առաջին պատճառն այն էր, որ նա, այդ մասին խոսելով, երկրում օրակարգը փոխեց, կրքերը հանդարտվեցին, մարդկանց մոտ առաջացրեց սպասում՝ քաղաքական ճանապարհով խնդրի լուծման վերաբերյալ, և մեծ լարվածությունը թուլացավ դրանով։ Այս մասին այսօր կայացած ասուլիսին հայտարարեց «Քաղաքացիական գիտակցություն» ՀԿ նախագահ Նարեկ Սամսոնյանը՝ անդրադառնալով արտահերթ ընտրությունների անցկացման, այնուհետև՝ դրանց անհրաժեշտությունը չլինելու մասին իշխանությունների հայտարարություններին։

«Եղան քաղաքական ուժեր, որոնք հայտարարեցին, որ մասնակցելու են արտահերթ ընտրություններին, ավելին՝ այդ ուժերը սկսեցին հանդիպել Նիկոլ Փաշինյանի հետ»,-հավելեց նա ՝ընդգծելով նաև, թե այդ քաղաքական ուժերը հիմնականում մարդ կուսակցություններ էին։

Նա նշեց՝ հասարակությունը սկսել էր մտածել, որ քանի որ Փաշինյանը սխալ էր, կլինեն արտահերթ ընտրություններ, և նա կհեռանա քաղաքական ճանապարհով։ «Նոյեմբերից մինչ օրս այդ օրակարգն աշխատել է հօգուտ Նիկոլ Փաշինյանի։ Որևէ իրական ընդդիմադիր քաղաքական առաջնորդ, թիմ չի հայտարարել, որ մասնակցելու է Նիկոլ Փաշինյանի արտահերթ ընտրություններին։ Նիկոլ Փաշինյանի իշխանությունը երկար չի տևելու Հայաստանում»,-նշեց նա։

Հաջորդիվ, ըստ Սամսոնյանի, Փաշինյանը մտածել է, որ եթե ստիպված լինի գնալ արտահերթ ընտրությունների, գնալու է իր պատկերացրած օրակարգով։

«Նրանք հարցումներ արեցին, և Նիկոլ Փաշինյանը տեսավ, որ այնուամենայնիվ, չի կարողանալու իր ունեցած ռեյտինգով 1 օր ավել իշխանության մնալ, և հրաժարվեց արտահերթ ընտրությունների մասին անգամ մտածելու հեռանկարից։ Հանրության շրջանում առկա է մեկ հարցի պատասխան՝ ինչու ՀՀ-ն դավաճանվեց գործող իշխանությունների կողմից։ Բոլորը հասկանում են, որ եղել է դավաճանություն։ ՀՀ-ն 30 տարի կարողացել է պահել Արցախը, բայցև ՀՀ-ն 44 օրվա ընթացքում իր որդիների զոհերի գնով տարածքները զիջեց Ադրբեջանին»,-ասաց նա։

Ըստ Սամսոնյանի՝ Փաշինյանի՝ իշխանության մնալու դեպքում սկսվելու է մեծ արտագաղթ․ «Այսօր ՀՀ քաղաքական ապագան երկընտրանքի առջև է․ կա՛մ Նիկոլ Փաշինյանի ղեկավարությամբ ՀՀ-ն գլորվում է անդունդը, որպես պետություն ոչնչացվում է, Երևանն էլ դառնում է թուրքական կամ ադրբեջանական վիլայեթ, կա՛մ գնում է Նիկոլ Փաշինյանին հեռացնելու ճանապարհով և փորձում է ուղղել կոտրված ողնաշարը»,-ասաց նա՝ տեսակետ հայտնելով նաև, որ Նիկոլ Փաշինյանի «փրկօղակը» այս ընդդիմության օրոք իշխանությունից հեռանալն է և բանտ նստելը, հակառակ դեպքում, ըստ Սամսոնյանի, Փաշինյանի կյանքի երաշխիքները խիստ կասկածի տակ են։

Սամսոնյանը նաև հույս հայտնեց, թե ընդդիմությունը հետևություններ է արել իր գործողություններից, և այսուհետ կդառնա ռադիկալ, կլինեն կոնկրետ գործողություններ, որոնք կբերեն արդյունքի։ «Ընդդիմությունը պետք է փորձի մի մասով աշխատել՝ հեռացնել դավաճանների իշխանությանը, ձևավորել ճգնաժամային կառավարություն»,-ասաց Նարեկ Սամսոնյանը։

Մանրամասները՝ տեսանյութում։