ԱԺ հանձնաժողովը բացասական եզրակացություն տվեց «Լուսավոր Հայաստան»-ի նախաձեռնած խորհրդարանի հայտարարության նախագծին

Իշխող «Իմ քայլը» դաշինքը կատարվածից որեւէ եզրակացություն չի արել, եւ դա սպառնում է Հայաստանին ու նրա ժողովրդին նոր մարտահրավերներով, որոնք կարող են հանգեցնել հերթական աղետին: Այս մասին պետաիրավական հարցերի մշտական խորհրդարանական հանձնաժողովի նիստում «Հայաստանի Հանրապետությունում իրավիճակը հաղթահարելու գործողությունների ծրագիր սահմանելու մասին» Ազգային ժողովի հայտարարության նախագծի քննարկման ժամանակ հայտարարեց «Լուսավոր Հայաստան» կուսակցության եւ նրա խորհրդարանական խմբակցության ղեկավար Էդմոն Մարուքյանը:

Նրա խոսքով՝ հանձնաժողովի շրջանակներում այս թեմայի շուրջ քննարկումը եւս մեկ անգամ ապացուցեց, որ գործող կառավարությունն ու «Իմ քայլը» իշխող դաշինքը ոչ մի դաս չեն քաղել: «Ինձ թվում է, որ դուք չեք էլ պատկերացնում, թե ինչ է տեղի ունեցել երկրում: Ինձ մոտ տպավորություն է ստեղծվել, որ դուք գաղափար չունեք, թե ինչ վիճակում ենք մենք հայտնվել: Ես հիմա խոսում եմ ծագած ճգնաժամի մասին: Եւ ես պարզապես ուզում եմ հակիրճ նշել, որ դուք ոչ մի դաս չեք քաղել այս աղետից», -ասաց Մարուքյանը իր ներկայացրած հայտարարության նախագծի բավականին երկար քննարկումներից հետո: Նշենք, որ ըստ Ազգային ժողովի հայտարարության նախագծի, Հայաստանի կառավարությունը, ի դեմս վարչապետ Նիկոլ Փաշինյանի, պետք է հրաժարական տար, որից հետո երկրում տեղի կունենային արտահերթ խորհրդարանական ընտրություններ, բայց իշխող դաշինքի պատգամավորները չսատարեցին «Լուսավոր Հայաստանի» նախաձեռնությունը՝ պաշտպանելով իրենց առաջնորդին եւ նրա գլխավորած կառավարությանը:

Մարուքյանը, մասնավորապես, նշեց, որ հաշվի առնելով այն հետեւանքները, որոնք առաջացել են 2020 թ. սեպտեմբերի 27-ին սկսված եւ նոյեմբերի 10-ին ավարտված ակտիվ ռազմական գործողությունների իրականացման հետեւանմքով, ինչպես նաեւ խորը թիկունքում գտնվող բնակավայրերի դեմ թշնամու հարվածների պատճառով` հաշվի առնելով Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիեւի եւ Ռուսաստանի Դաշնության նախագահ Վլադիմիր Պուտինի կողմից 2020 թ․ նոյեմբերի 9-ի հայտարարության ստորագրումից հետո տեղի ունեցած հասարակական-քաղաքական իրադարձությունները, դրանց հնարավոր հետեւանքները, տեսնելով ՀՀ վարչապետի կողմից ավելի վաղ հնչեցված անընդունելի բռնության կոչերը, եւ որեւէ պատասխանատվություն ստանձնելու նրա բացարձակ անկարողությունը, վերլուծելով ՀՀ կառավարության անդամների, այդ թվում `թոշակառուների, ինչպես նաեւ տարբեր գերատեսչությունների բարձրաստիճան պաշտոնյաների ներկայացրած փաստական հանգամանքները՝ «Լուսավոր Հայաստան» կուսակցությունը որոշեց ներկայացնել ստեղծված իրավիճակից դուրս գալու գործողությունների ծրագիր։ Այնուհետեւ «Լուսավոր Հայաստան»-ի ղեկավարը ներկայացրեց իր «ճանապարհային քարտեզը», որը աջակցություն չստացավ իշխող դաշինքի կողմից: «Հայաստանի գործող կառավարության ծրագիրն այլեւս չի համապատասխանում առաջնահերթ հարցերին եւ նոր իրողություններին, որոնց բախվել են Հայաստանի եւ Ղարաբաղի բնակիչները պատերազմից հետո, եւ որոնց շուտափույթ լուծման կարիք ունեն»,- իր ելույթում ասաց Էդմոն Մարուքյանը: Հարկ է նշել նաեւ, որ այս հարցի քննարկմանը ներկա չէին ներկայացուցիչներ «Բարգավաճ Հայաստան» կուսակցությունից: Այնուամենայնիվ, բավականին բուռն եւ հուզական քննարկումներից հետո մշտական խորհրդարանական հանձնաժողովը բացասական եզրակացություն տվեց «Լուսավոր Հայաստան»-ի նախաձեռնած Ազգային ժողովի հայտարարության նախագծին: