Էրդողանի նախկին խորհրդականը մարդասպաններ է պատրաստում

Թուրքիայի նախագահ Ռեջեփ Թայիփ Էրդողանի անվտանգության նախկին խորհրդականին պատկանող Պաշտպանական խորհրդատվական ծառայությունը սկսել է սպանության դասընթացներ առաջարկել, գրում է Ahval-ը:

SADAT-ը իր կայքում դասընթացը հայտարարել է որպես պաշտպանական դասընթացի ուսումնական պլան` նշելով, որ այն ներառում է «ֆիզիկական պատրաստվածության եւ տոկունության մարզում, առաջին բուժօգնություն, VIP պաշտպանություն եւ տրանսպորտային միջոցների պաշտպանություն», որի շրջանակներում օգտագործվում են տարբեր գործիքներ՝ զանազան զենքեր, նավակներ, էլեկտրոնային մոդելավորման համակարգեր եւ առաջին օգնության մոդելավորման համակարգեր»: Դասընթացի ավարտից հետո թեկնածուները «մարդկանց, շենքերի, տրանսպորտային միջոցների եւ մարզերի պաշտպանության հիմնական մեթոդների, առաջին օգնության եւ սպանության մեթոդների հմտություններ են ձեռք բերում»,- ասվում է SADAT-ի հայտարարության մեջ:

Ադնան Թանրիվերդին, ով հիմնադրել է Թուրքիայի կառավարության կողմից աջակցվող SADAT Defence Consultancy ռազմականացված կազմակերպությունը, թուրքական բանակի պաշտոնաթող գեներալ է, ով, ըստ հաղորդումների, հեռացվել է թուրքական զինված ուժերից իր իսլամիստական հայացքների համար:

SADAT-ը անվտանգության մասնավոր ընկերություն է, որն առաջարկում է ոչ սովորական պատերազմների, գնդացիրների եւ ցամաքային պատերազմների, ինչպես նաեւ հակատանկային տեխնիկայի եւ զրահատեխնիկայի դեմ մեթոդների ուսուցում:

SADAT-ի նպատակը «իսլամական երկրների միջեւ իսլամական աշխարհին օգնելու համար պաշտպանական համագործակցություն եւ ռազմարդյունաբերական համագործակցություն հաստատելն է»:

Լինելով Էրդողանի նախկին գլխավոր խորհրդական՝ Թանրիվերդին առաջարկել է ստեղծել իսլամական պետություն, որի մայրաքաղաքը Ստամբուլն է, իսկ պաշտոնական լեզուն՝ արաբերենը:

Սպանության դասընթացների SADAT-ի առաջարկը գալիս է Թուրքիայում հերթական հեղաշրջման մասին ԱԶԿ-ից լուրեր տարածելու ֆոնին: 2016-ի հուլիսի 15-ին հեղաշրջման փորձի ժամանակ SADAT-ի դերը շարունակում է մնալ բուռն քննարկման թեմա Թուրքիայում: