Ինչ ասել եմ, ճիշտ եմ ասել, շարունակելու եմ այդ քաղաքական ելույթները. Իշխան Սաղաթելյանը ոստիկանությունից դուրս եկավ

Արդեն ավանդույթ է դարձել, ամեն ելույթիցս հետո ինձ ինչ-որ մի իրավապահ մարմին կանչում է բացատրություն տալու։ Այս մասին այսօր՝ դեկտեմբերի 25-ին, ՀՀ ոստիկանության քրեական հետախուզության գլխավոր վարչությունից դուրս գալուց հետո լրագրողներին ասաց ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ հրավիրվել էր Ոստիկանություն՝ ՀՔԾ-ին դիմած իր ելույթի վերաբերյալ բացատրություն տալու համար. «Որեւէ պարզաբանում չեմ տվել, որեւէ բացատրություն չեմ տվել, որովհետեւ գտնում եմ՝ դրա անհրաժեշտությունը չկա։ Ինչ-որ ասել եմ՝ ճիշտ եմ ասել, շարունակելու եմ այդ քաղաքական ելույթները, սա հայրենիքի փրկության պայքար է, այսպիսի մեթոդներով մեզ որեւէ մեկը ոչ կարող է լռեցնել, ոչ էլ պայքարից հետ պահել»։

Անդրադառնալով «Ամանորն առանց Նիկոլ Փաշինյանի» կարգախոսին՝ Սաղաթելյանն ընդգծեց, որ իրենց պայքարը շարունակվում է բոլոր ուղղություններով. «Բոլոր այն տեսակետները, կարծիքները, որ պայքարը կարող է մարել, նահանջել, վստահեցնում եմ՝ նման բան պարզապես տեղի ունենալ չի կարող։ Քանի այս չարիքի կառավարությունը գոյություն ունի, պայքարը գնալով ավելի թեժանալու է, որովհետեւ հայ մարդը չի կարող հանդուրժել այս չարիքի կառավարությանը։ Րոպե առաջ պետք է հեռացնենք, որպեսզի կարողանանք կառուցել նորմալ երկիր։ Օրինակ՝ երեկվա մեր նախաձեռնությունը՝ շրջափակել Կառավարության շենքը, վճռական գործողությո՞ւն էր, թե՞ ոչ։ Իմ գնահատմամբ շատ վճռական գործողություն էր։ Մեր՝ նիստը չեղարկելուց բացի նպատակն էր նաեւ 4 ժամ Կառավարությանը, ըստ էության, գտնվում էր շրջափակման մեջ։ Մենք ամեն ինչ անելու ենք այդ պայքարի հաղթանակի համար, որովհետեւ սա իշխանություն եւ ընդդիմություն պայքարը չէ, սա չարիքի կառավարությանը հեռացնելու պայքար է, որպեսզի կարողանանք փրկել մեր հայրենիքը»։

Իշխան Սաղաթելյանը շեշտեց, որ Նիկոլ Փաշինյանի՝ իշխանության ամեն մի րոպե ավելի մնալը կորուստ է մեր երկրից. «Ազգային աղետին այլեւս հաջորդում է սոցիալ-տնտեսական կոլապսը, առաջիկայում լուրջ խնդիրներ ենք ունենալու նաեւ այս առումով։ Մենք ամեն ինչ եւ ամեն օր անելու ենք, որպեսզի այս մարդը հեռանա։ Մեր պայքարը վճռական ու աննահանջ է։ Ամեն ինչ անելու ենք, որ մինչեւ Նոր տարի լինի դա։ Եթե հանկարծ Նոր տարի մտնենք Նիկոլով, այդ գիշերվանից սկսած նույն վճռականությամբ շարունակելու ենք պայքարը»։

Անդրադառնալով իրենց ակցիաներին եւ արվող առաջիկա քայլերին՝ Սաղաթելյանն ասաց, որ հենց այսօր տեղի են ունենալու անհնազանդության բողոքի ակցիաներ. «Հանրապետության հրապարակում մեր վրաններ ավելի են ամրացվելու, այնտեղ են տեղափոխվելու նաեւ մեր կենտրոնական շտաբը, այսինքն՝ Հանրապետության հրապարակը լինելու է շարժման ղեկավարման կենտրոնը»։

Հարցին՝ հայ հանրության մի հատվածի անտարբերությունն, ըստ իրեն, ինչո՞վ է պայմանավորված, Սաղաթելյանը պատասխանեց.

«Կորցնում ենք ամեն օր, ամեն վայրկյան, որը մեր պետականությունն այս տեմպերով կտանի կործանման։ Ստացվել է մի իրավիճակ, երբ իշխանության քարոզչության ու որոշների անմիջական մասնակցությամբ փորձում են այս պայքարը դարձնել ընդդիմություն եւ իշխանություն պայքար։ Նիկոլը սա հրահրում է, որպեսզի սա դարձնի դասակարգային պայքար, այսինքն՝ էլիտար ժողովուրդ, նորեր-նախկիններ։ Այստեղ է, որ մեր հասարակության մի որոշակի կարեւոր զանգված դեռ չի գիտակցում, որ սա իշխանության ու ընդդիմության կռիվ չէ, սա երկիրը փրկելու ծրագիր է։ Վստահ եմ, որ մեր այն քաղաքացիները, որոնք ամբողջությամբ դեռ չեն գնահատում այս իրավիճակը, առաջիկա օրերին պետք է հասկանան եւ միանան։ 44 օրվա ընթացքում կորցրել ենք 4 բնակավայր, Սյունիքում 2 կարեւոր դիրք ենք զիջել, Կապան գնացող ճանապարհը թշնամու հսկողության տակ է, տեսնում ենք Գեղարքունիքը, Որոտանը։ Ո՞նց կարող է հայ մարդը լինել անտարբեր ու ասի՝ քանի Երեւանի կենտրոնում չեն, շարունակեմ մնալ տանը։ ՀՀ քաղաքացին չի հանդուրժելու այս չարիքի Կառավարությանը եւ թույլ չի տալու, որ այս խելագարը մեր պետությունը տանի կործանման»։