Օզեմպիկ ընդունողներն ավելի քիչ նիկոտին են չարաշահում
![](/timthumb.php?src=/disc/16-07-24/4924016d71de6f0dd2dfa0b86d4341d0.jpg&w=708)
Ըստ Daily Mail-ում հրապարակված տեղեկության՝ հետազոտությունները վկայում են, որ շաքարախտի և ճարպակալման բուժման համար նախատեսված Օզեմպիկ (Ozempic) և Վեգովի (Wegovy) դեղամիջոցներն ընդունակ են դրականորեն անդրադառնալ ուղեղի առողջության վրա և նվազեցնել նիկոտինից կախվածությունը:
Սեմագլուտիդը, որն Օզեմպիկի և Վեգովի ակտիվ բաղադրիչն է, նորարարական դեղամիջոց է քաշի նվազեցման և արյան մեջ շաքարի մակարդակի վերահսկման համար:
Գիտնականները նոր հետազոտության ընթացքում վերլուծել են 2-րդ տիպի շաքարախտով հիվանդ 120 հազար ամերիկացիների տվյալները։
Սեմագլուտիդի և մյուս դեղամիջոցների ազդեցության համեմատությունը հոգեկան խանգարումների ռիսկի վրա բացահայտել է հետևյալը։
Սեմագլուտիդ ընդունող հիվանդների շրջանում էնցեֆալիտի՝ գանգուղեղի բորբոքման զարգացման ռիսկը կրճատվել է 74%-ով, հիշողության և մտածողության խանգարումները՝ 28%-ով, դեմենցիան՝ 37-48%-ով, իսկ նիկոտինի չարաշահումը՝ 23-28%-ով։
Գիտնականները նշել են, որ իրենց հետազոտությունը հիմնված է դիտարկումների վրա և պատճառահետևանքային կապի միանշանակ ապացույցներ չի բերում:
Սեմագլուտիդի գործողության մեխանիզմը ախորժակի նվազեցումն է: Դեղամիջոցի ընդունումը կարող է ուղեկցվել մի շարք կողմնակի ազդեցություններով, մասնավորապես սրտխառնոցով, փորկապությամբ, փորլուծությամբ, հոգնածությամբ, ստամոքսի ցավով, գլխացավով և գլխապտույտով:
Հիվանդներից ոմանց մոտ կարող է նաև մազաթափություն նկատվել: