Նիկոլ Փաշինյանը պետք է հեռանա. Արման Նավասարդյան

44 օրվա պայքարից հետո հայ ժողովուրդը կորցրեց Արցախի 7 շրջան, նաև Հադրութը և Շուշին: Արտակարգ և լիազոր դեսպան Արման Նավասարդյանի խոսքով՝ իրերն իրենց անուններով կոչելու ժամանակն է:

«Մենք, փաստորեն, կորցնում ենք Արցախը, եթե իրերը կոչենք իրենց անուններով: Այդպես չպետք է լիներ, բայց, իհարկե, հաշվարկումները շատ վատ ու սխալ էին արված, որովհետև մենք պարզապես պատրաստ չէինք այս պատերազմին», - ասում է Արման Նավասարդյանը:

Արման Նավասարդյանի խոսքով՝ պատերազմը, թեև ավարտվեց, բայց հետագա զարգացումների մասին խոսելն այժմ բարդ է: Նրա խոսքով՝ այս պայքարում ուժերը խիստ անհավասար էին:

«Մեր բանակը 20-րդ դարի բանակ է, իսկ այն, ինչ ունի մեր հակառակորդը, 21-րդ դարի բանակ է: Բացի այդ, մենք, փաստորեն, 8 պետության դեմ էինք կռվում: Սա մարդկային կարողություններից ու հնարավորություններից վեր էր», -ասում է Արման Նավասարդյանը:

Արտակարգ և լիազոր դեսպանը նշում է՝ այս անհաջողությունը միայն ռազմական խնդիր չէ: Այն տարածքները, որոնք մնացել են հայկական կողմին, կարգավիճակ չունեն: Նույնիսկ այդ տարածքներում ապրող արցախցիների վերադարձը հայրենիք, Արման Նավասարդյանի խոսքով, անիրատեսական է:

«2 օր է՝ փաստաթղթում ոչինչ չի ասվել կարգավիճակի մասին: Այսինքն՝ հենց այնպես տվել ենք, դա է դուրս գալիս: Եվ հետո որ ասում են՝ փախստականները պետք է վերադառնան. ի՞նչ վերադառնալ, որտե՞ղ վերադառնան: Ես ասում եմ դառը իրականությունը», - ասում է Արման Նավասարդյանը

Արման Նավասարդյանի խոսքով՝ 7 տարածքներն ի սկզբանե Հայաստանի դիվանագիտության ամենաթույլ տեղն են եղել: Այնուամենայնիվ, սա, ինչպես նշում է դեսպանը, այն անդառնալի կետը չէ: Թեև երկար ժամանակ կպահանջվի, բայց իրողությունը շտկելը հնարավոր է: Արման Նավասարդյանի խոսքով՝ Հայաստանը չկարողացավ դաշնակիցների ուշադրությունը հրավիրել այն բոլոր վտանգների վրա, որոնք պատերազմի ընթացքում կախվել էին Հայաստանի ու Արցախի գլխին: