Ուծացնողը

Նիկոլ Փաշինյանը հայտարարեց, թե շուտով արտերկրից մոտ հարյուր մասնագետ է ժամանելու Հայաստան եւ աշխատելու կառավարման ոլորտում: Ոչ մի երաշխիք չկա, որ նրանք չեն լինելու Սինանյան եւ Ռեւազյան: Հիմա պատկերացրեք մեր երկրի վիճակը, որտեղ ամենաբարձր պաշտոններում հարյուր Սինանյան կամ հարյուր Ռեւազյան է աշխատում:

Եթե Ռեւազյանը տապալեց միայն իր ղեկավարած ոլորտը, ապա Զարեհ Սինայանը ոչ միայն տապալում, այլ նաեւ սկանդալային հայտարարություններ է անում, որոնք վնասում են Հայաստանի միջազգային վարկանիշը եւ մեր հակառակորդների բերանում ավելորդ լեզու դնում:

Օրերս Սփյուռքի հարցերով գլխավոր հանձնակատար Սինանյանը հյուրընկալվելով «Ազատություն» ռադիոկայանին առնվազն երկու սկանդալային հայտարարություն արեց. նախ նա պնդեց, որ մենք պետք է քրիստոնյա արաբներին եւ ասորիներին Հայաստան բերենք, որ նրանց «ուծեցնենք», իսկ հետո հակագիտական պնդում արեց, ասելով, թե ճապոնացիներն առաջացել են չինացիների եւ կորեացիների խաչասերումից:

Եթե Հայաստանի միջազգային կշիռն ավելին լիներ, քան այսօր է, ապա հաստատ Ճապոնիան Հայաստանին բողոքի նոտա կհղեր, Ճապոնիայում Հայաստանի դեսպանին կհրավիրեր ԱԳ նախարարություն եւ բացատրություն կպահանջեր:

Մեզ համար ավելի վտանգավոր է Սինանյանի մյուս հայտարարությունը: Պետական բարձր պաշտոն զբաղեցնող այս մարդը պատկերացում չունի, որ ուծացումը հանցագործություն է, ցեղասպանության մի մասնիկ: Նա այնքան մանկամիտ է, որ չի հասկանում, որ անգամ այն երկրներում, որտեղ ժողովուրդ կամ ժողովուրդներ են ուծացվել, համառորեն հերքում են այդ փաստը:

Որքան ապուշ պետք է լինես, որ հրապարակային հայտարարություն անես, որ քո նպատակն առնվազն երկու ազգի ուծացնելն է: Նույնիսկ թուրքերը համառորեն հերքում են, որ դարեր շարունակ ուծացրել են այս կամ այն ժողովրդների ներկայացուցիչներին: Հերքում են, հասկանալով, թե դա ինչ հրեշավոր հանցագործություն է: 

Իսկ Սինանյանը լեզու է դնում մեր հակառակորդների բերանում: Իսկ որ ամենավատն է, վիրավորում Հայաստանում ապրող եզդիներին, հասկացնելով, որ ինքը նպատակ ունի նրանց եւս «ուծացնել»: Դե եթե մարդը մտադիր է ասորիներ բերել եւ «ուծացնել», ապա ինչու չուծացնել նաեւ եզդիներին կամ ռուսներին:

Տարօրինակն այն է, որ Սինանյանը դեռ պաշտոնանկ չի արվել: Ոչ միայն տարօրինակ է, այլ մտահոգիչ: Ստացվում է Նիկոլ Փաշինյանը նրա հետ համակարծիք է, քանի որ ոչ բացատրություն է տվել, ոչ ներողություն խնդրել, ոչ էլ Սինանյանին պաշտոնանկ արել:

Վարդան Մխիթարյան

Top-News.am