Ովքե՞ր են ցնցակաթվածի ենթարկվում Ռոբերտ Քոչարյանի խոսքից

Ռոբերտ Քոչարյանն ուզում էր մամուլի ասուլիս տալ եւ պատասխանել լրագրողներին հետաքրքրող հարցերին, բայց մեզ հայտնի ուժերը ցնցակաթվածի մեջ ընկան եւ իշխանությունների ակտիվ մասնակցությամբ, բառիս բուն իմաստով, փողոցային խուժանի նման ամեն ինչ արեցին, որ այն չկայանա: Նրանք ցույց տվեցին, որ սարսափում են ՀՀ երկրորդ նախագահի խոսքից:

Հիմա էլ ոչինչ չի փոխվել, պարզապես չեն կարողանում հեռուստաալիքներին արգելել հարցազրույց վերցնել կամ նկարահանել Քոչարյանի մասնակցությամբ հանդիպումները: Չեն կարողանում եւ ցնցակաթվածի մեջ են ընկնում եւ Քոչարյանի խոսքից, եւ նաեւ նրանից, որ չեն կարողանում արգելել:

Բացառություն չէր նաեւ ՀՀ երկրորդ նախագահի հանդիպումը տնտեսական վերլուծաբանների հետ: Նրանց կարելի է հասկանալ. Քոչարյանի յուրաքանչյուր խոսքից հետո հասարակական տրամադրությունները փլվում են, իսկ հայտնի ուժերի տարիներ շարունակ տարածած սուտն ու կեղծիքը՝ փշրվում:

Ավելին, ոչինչ չեն կարողանում հակադրել Ռոբերտ Քոչարյանի բերած փաստարկներին, տված գնահատականներին եւ խոտ տեսած զամբիկի նման տռճիկ են տալիս, երբ երկրորդ նախագահը ասում է Պարսկաստան, հետո տալիս Իրանի անունը, եւ դա ներկայացնում այնպես, որ ոմանց համոզեն, թե տեսեք-տեսեք Քոչարյանն ինչ սխալներ է անում: Սա է սրանց մակարդակը:  

Փոխանակ խոսեն, թե ինչու Նիկոլ Փաշինյանի տնտեսական հեղափոխությունը ձախողվեց  այն հայտարարելու հենց հաջորդ օրը, փոխանակ ասեն, թե ինչու է մեկ անձից գնումներն այդքան աճել, փոխանակ ասեն, թե ինչու ներդրումներ չկան: Միայն չասեք կորոնավիրուս. նախ այդ ներդրումները եւ ձախողումներն առկա էին դեռ մինչեւ կորոնավիրուսը, հետո Նիկոլ Փաշինյանը հայտարարեց, թե կորոնավիրուսը կօգնի, որ Հայաստանը զբաղեցնի համաշխարհային տնտեսության մեկ տոկոսը:

Ռոբերտ Քոչարյանն ասում է, որ առանց նորմալ բիզնես միջավայրի ներդրում չի լինի: Ի՞նչ ասեն. բացատրեն, որ ներդրում լինում է, երբ տեղի-անտեղի անդադար հեղափոխություն են ասում, սպառնում ասֆալտին փռել, քրեական գործեր են հարուցում գործարարների նկատմամբ կամ դատարկաբանո՞ւմ են:

1998-2008 թվականներին տնտեսությունն աճեց վեց անգամ, բյուջեն՝ ութ, կենսամակարդակը՝ վեց: Իսկ ի՞նչ ասեն Քոչարյանի խոսքից ցնցակաթվածի մեջ ընկնողները. բացատրեն, որ կարեւորը ոչ թե տնտեսական աճն ու կենսամակարդակի աճն է, այլ նախարարների եւ պատգամավորների աշխատավարձերն ու պարգեւավճարնե՞րը, թե՞ մարդկանց համոզեն, որ կարեւորը լայվերի քանակն է: 

Լսում են Ռոբերտ Քոչարյանին եւ ցնցակաթվածի մեջ ընկնում բոլոր նրանք, ովքեր իննսունականներին ամեն ինչ անում էին երկիրը հետ շպրտելու համար, եւ ովքեր Հրանտ Բագրատյանին էին ծաղրում՝ ԱԷԿ-ը գործարկելու ջանքեր գործադրելու համար: Ցնցակաթվածի մեջ են ընկնում նրանք, ովքեր հիմա էլ են ամեն ինչ անում երկիրը հետ շպրտելու համար:  

Թալանից խոսում են նրանք, որոնց կառավարման տարիներին թալանվեց խորհրդային երկրից ժառանգություն ստացած ներուժը: Թալանից եւ անարդարությունից խոսում են նրանք, ովքեր գործարանները, բառիս բուն իմաստով, որպես մետաղի ջարդոն եւ շինանյութ վաճառում էին, իսկ արդարադատությունը վերածել էին խայտառակ եւ անարդար մի համակարգի, որի ընդունած որոշումներից մարդկանց կյանքեր խորտակվեցին:

Ռոբերտ Քոչարյանը հանուն երկրի զարգացման, ցնցումներից խուսափելու համար, եւ բարի կամք դրսեւորելով ոչինչ չարեց հանցագործներին հայտնաբերելու եւ պատժելու համար: Գուցե սխալվեց, իսկ գուցե՝ ոչ, դեռ վաղ է այդ մասին եզրահանգումներ անել, բայց փոխանակ շնորհակալ լինեն ՀՀ երկրորդ նախագահից, որ իրենց քրեական հետապնդման չենթարկեց, հիմա իրենց ամբողջ ներուժը ծախսում են նրան վարկաբեկելու փորձեր անելու համար:

Մի արեք, ժամանակ մի ծախսեք, դա նույնն է, եթե Բարսելոնայի ղեկավարությունը հսկայական միջոցներ ծախսի, ժողովրդին համոզելու համար, թե ավելի լավ է Բավարիային 8:2 հաշվով պարտվել, քան տիրանալ Չեմպիոնների լիգայի գավաթին:

Վարդան Մխիթարյան

Top-News.am