13 եւ 14 տարեկան երեխաներ են զոհվել. ցեղասպանություն Հայաստանի ճանապարհներին

ՀՀ արտակարգ իրավիճակների նախարարություն հուլիսի 8-ին, ժամը 19:20-ին ահազանգ է ստացվել, որ Արարատի մարզի Դալար գյուղում տեղի է ունեցել ՃՏՊ. կան տուժածներ:

ԱԻՆ կայքը հայտնում է, որ դեպքի վայր է մեկնել մեկ մարտական հաշվարկ:

Պարզվել է, որ բախվել են «ՎԱԶ-2101» մակնիշի 56 FU 272 պետհամարանիշի ավտոմեքենան (վարորդ Ս. Մ.) և կվադրոցիկլը, ինչի հետևանքով վերջինիս վարորդ՝ 2003 թ. ծնված Հ. Ի.-ը և ուղևոր՝ 2004 թ. ծնված Գ. Խ.-ը Արտաշատի ԲԿ հոսպիտալացման ճանապարհին մահացել են։

Shamshyan.com կայքը հայտնում է, որ դեպքը տեղի է ունեցել Արարատի մարզի Բերքանուշ գյուղի Չարենցի փողոցի թիվ 15 տան դիմաց։ 

Դեպքի վայրում հավաքվածներն ասել են, որ մահացած երեխաները Բերքանուշ գյուղից էին, մեկը 14-ամյա Հովհաննես Իսկանդարյանն էր, իսկ մյուսը՝ 13-ամյա Գոռ Խաչատրյանը, իսկ վիրավորը 13 տարեկան Երեմ Հախվերդյանն է:

Այս ողբերգությունը կարո՞ղ է սթափեցնել մեզ: Այն աստիճանի բարոյալքման մեջ ենք, որ դժվար է հավատալ, որ կսթափվեն բոլոր նրանք, ովքեր վայրենու նման են վարում ավտոմեքենաները: Պատկերացնո՞ւմ եք, թե գյուղական ճանապարհին ինչ արագություն է զարգացրել «01»-ը, որի հարվածից կվադրոցիկլը նման վիճակում է հայտնվել:

Իսկ երբ կհասկանան ծնողները, որ երեխաների հաշվին չի կարելի թիթիզանալ, լոպազանալ: Եթե 14 կամ 13 տարեկան երեխան կվադրոցիկլ չվարեր փողոցներում, ապա դրանցից նրանք չէին տուժի:

Սարսափելի վիճակ է մեր երկրում: Ողբերգական վիճակ: Տգիտությունը խժռում է մեր երկիրը:

Բառիս բուն իմաստով Հայաստանի ճանապարհներին, բոլոր ճանապարհներին պետք է արտակարգ դրություն մտցնել, իսկ արագությունը գերազանցողներին պետք է զրկել ավտոմեքենա վարելու իրավունքից, իսկ ավտոմեքենան պետք է բռնագրավել:

Top-News.am