Ռոբերտ Քոչարյանին կալանքի տակ պահելը հարված է մեր պետականությանը

Ամիսներ շարունակ, ինչպես պնդում են իրավաբանները, ՀՀ երկրորդ նախագահ Ռոբերտ Քոչարյանն ապօրինաբար զրկված է ազատությունից: Փաստաբանները բերում են հազար ու մի ապացույց, որը փաստում է նրա կալանավորման ապօրինությունը, այսուհանդերձ, հուրախություն Հայաստանի հակառակորդների եւ թշնամիների նա մնում է անազատութան մեջ:

Ի դեպ, այն որ դեռ բուժումը չավարտած ՀՀ երկրորդ նախագահը, այն էլ կորոնավիրուսային համավարակի պայմաններում հիվանդանոցից տեղափոխվեց մեկուսարան, մեկ անգամ եւս վկայում է գործող իշխծանությունների վերաբերմունքը նրա նկատմամբ: Պատահական չէ, որ ՀՀ քաղաքացիների մոտ արդեն իսկ ամուր համոզմունք կա, որ կառավարող ուժը ձգտում է ամեն կերպ նրան զրկել ազատությունից:

Հայաստանի եւ Արցախի նախկին չորս վարչապետ երաշխավորել են Ռոբերտ Քոչարյանի խափանման միջոցը փոխելու համար, բայց դատական նիստը տարբեր պատճառներով հետաձգվում է: Հիշեցնենք, որ դրանից առաջ երաշխավորությամբ հանդես էին եկել նաեւ Արցախի նախկին եւ ներկա նախագահները, բայց վերաքննիչը գնաց մի քայլի, որը հնարավոր չէ ձեւակերպել մեղմ եւ կոռեկտ բնորոշումներով:

Միանշանակ է, որ Ռոբերտ Քոչարյանի դեմ քրեական գործի հարուցումը եւ առավել եւս նրան կալանավորելը բխում է մեր պետության հակառակորդների շահերից եւ մեծ ուրախություն պատճառում նրանց: Միայն սա բավական է հասկանալու համար, որ նա ժամ առաջ պետք է ազատ արձակվի: Այսուհանդերձ, երբ հիշում ես, թե ինչ կարգի եւ ինչ թույլ քրեական գործ է «կարվել» երկրորդ նախագահի դեմ նրան կալանավորելու համար, հասկանում ես, որ կառավարող ուժը դեռ ամեն ինչ անելու է նրան կալանքի տակ պահելու համար:

Մյուս կողմից բանականությունը հուշում է, որ երկար ժամանակ հնարավոր չէ Ռոբերտ Քոչարյանին պահել կալանքի տակ: Մի օր դատարանը ստիպված է լինելու փոխել խափանման միջոցը, իսկ մեկ այլ օր՝ կարճել հարուցված քրեական գործը: Ընդ որում, որքան շուտ գան այդ օրերը, այնքան դրանից կշահի մեր պետությունը:

Հակոբ Ասատրյան

Top-News.am