Սիրողական մակարդակի կառավարություն

Ի՞նչ միջոցառումներ էր իրականացրել, ի՞նչ քայլեր էր արել Հայաստանի կառավարությունը կորոնավիրուսին դիմակայելու համար: Պարզվում է գրեթե ոչ մի քայլ, ոչ մի միջոցառում: Այսօր արդեն համոզվել ենք, որ կառավարությունը տապալել է կանխարգելիչ միջոցառումների անցկացումը:

Ներկայացնենք ընդամենը մի քանի փաստ.

1. Առողջապահության նախարարը հայտարարում է, թե իր երեխաներին վաղը դպրոց է ուղարկելու, իսկ մեկ ժամ անց որոժում է կայացվում ուսումնական հաստատություններում մեկշաբաթյա արձակուրդ հայտարարել:

2. Որեւէ մեկն այդպես էլ չհիմնավորեց, թե ինչու մեկ շաբաթով, ինչու հիմա, եւ ի՞նչ երաշխիք, որ մարտի 9-ից հետո դպրոց կամ համալսարան հաճախելն անվտանգ է լինելու:

3. Կառավարության անդամներ, պատգամավորներ կորոնավիրուսի մասին բարձրաձայնողներին մեղադրում էին խուճապ տարածելու մեջ, իսկ հետո իրենք սկսեցին խոսել կորոնավիրուսի վտանգավոր լինելու մասին;

4. Հայաստանից արտահանվեց մեծ քանակությամբ բժշկական դիմակ: Կառավարությունը ոչինչ չարեց այն կանխելու համար: 

5. Բավական ուշացումով, այն էլ շատ վատ ձեւով եւ եղանակով մարդկանց սկսեցին բացատրել, թե ինչ պետք է անել կորոնավիրուսից խուսափելու համար:

6. կորոնավիրուսի որոշման թեսթեր, որպես այդպիսին Հայաստանի կառավարությունը ձեռք չի բերել: Մարդկանց կոչ են անում ախտանշանների դեպքում դիմել պոլիկլինիկա, բայց դիմեն, որ ի՞նչ անեն, եթե կորոնավիրուսի որոշման թեսթ չի արվելու:

7. Կորոնավիրուսակրին եւ մնացյալ կասկածյալներին տեղավորեցին բարձրալեռնային առողջարանային գոտում, ապացուցելով, որ անգամ այս հարցում սիրողականից էլ ցածր մակարդակ ունեն: Այս քայլով վտանգեցին կորոնավիրուսակրի եւ մյուս կասկածյալների առողջությունը, մյուս կողմից ծանր հարված հասցվեց Ծաղկաձորի զբոսաշրջիկային տնտեսությանը:

8. Քաղաքային տրանսպորտում որեւէ ախտահանիչ միջոցառումներ չի իրականացվում:

9. Քաղաքային տրանսպորտից օգտվում են առանց դիմակների: Պատճառը երկուսն է. դիմակ չկա, իսկ նրանք, ովքեր ունեն, հարկ չեն համարում այն օգտագործել:

10. Հայաստանի սահմաններում անվտանգության միջոցառումները գրեթե զրոյական են: Թեհրանից հատուկ չվերթով ժամանածները տուն են հասել տաքսիներով, ավտոբուսներով: Ի՞նչ իմաստ ուներ հատուկ չվերթը, եթե նրանց հատուկ ավտոբուսներով չպետք է տեղափոխեին բուժհաստատություն եւ մանրակրկիտ ստուգման ենթարկեին:

Վարդան Մխիթարյան

Top-News.am