Ամենայն հայոց տուրիստը

Գործուղումների վրա ամենաշատ գումար ծախսած պաշտոնյան նախագահ Արմեն Սարգսյանն է, որը հասցրել է բյուջեից այս նպատակի համար վերցնել մոտ 123 մլն դրամ կամ 256 հազար դոլար։ 

Հիմա մի կողմ դնենք այդ 256 հազար դոլարը: Ամեն դեպքում այս թիվը կարող էր լինել շատ ավելի շատ: Փորձենք հասկանալ ուր եւ ինչու է մեկնել Արմեն Սարգսյանը եւ ինչ է շահել դրանից մեր պետությունը:

Ի վերջո Արմեն Սարգսյանը պետք է հաշվետու լինի ՀՀ քաղաքացուն, թե՝ ոչ: Սա է ամենակարեւորը։ Չկա որեւէ նորմ, որը կպարտադրի նախագահին հաշվետվության։ Հիմնվել անհատական բարոյականության վրա՝ անլուրջ է։ Մանավանդ գործարար նախագահի պարագայում, որը կգնա այնտեղ, ուր սեփական բիզնես շահն է պահանջում, եւ կմնա այնքան ժամանակ քանի դեռ իր բիզնես շահը չի բավարարվել։

Շատ կարեւոր է հասկանալ այցերի տրամաբանաությունը՝ ինչո՞ւ գնաց, օգո՞ւտը, Հայաստանի շա՞հը, արդյունքնե՞րը։ Անչափ կարեւոր է նաեւ այդ այցերի տեւողությունները: Հավատացեք, կարող է ստացվել այնպես, որ երկրի նախագահը տարվա մի զգալի մասը պարզապես երկրում չի լինում: Ի դեպ, մենք պաշտոնական հարցում ենք ուղարկելու նրա աշխատակազմ՝ պարզելու համար տուրիստ-նախագահի երկրից բացակայության պաշոտանական թվերը։

Եթե նայեք վերջին մեկ տարվա լրահոսը, ապա արտագնա տուրիզմի աշխարհագրությունը շատ ընգրկուն է Սերբիա, Խորվաթիա, Գերմանիա, Արաբական Միացյալ Էմիրություններ, Շվեյցարիա, Իտալիա, Մեծ Բրիտանիա, Ֆրանսիա, Իսպանիա, Պորտուգալիա, Ճապոնիա, Հորդանան, Լիբանան, Ռուսաստան եւ այլն։ Հիմա մնում է հասկանալ, երբ է նա հանրությանն ասելու, թե ինչ շահեց երկիրն այդ այցերից, ինչ օգուտ մեր երկիրը քաղեց այդ գործողությումներից:

Ակնհայտ է, որ այս այցերը լրացուցիչ պարզաբանման կարիք են զգում: Պատահական չէ, որ գնալով օդում ավելի ու ավելի շատ են կախվում այն լուրերը, թե նախագահը բյուջեի հաշվին արտերկիր է մեկնում սեփական բիզնես խնդիրները կարգավորելու համար:

Աննա Բաղդասարյան

Top-News.am