Սովորեցրու ամեն ինչ, բայց ոչ նախագահ դառնալը

Փետրվարի 4-ն ամբողջ աշխարհում նշվում է որպես քաղցկեղի դեմ պայքարի միջազգային օր, իսկ փետրվարի 15-ը՝ մանկական քաղցկեղի դեմ պայքարի միջազգային օր՝ նպատակ ունենալով հասարակության ուշադրությունը հրավիրել երեխաների՝ քաղցկեղով հիվանդացության խնդիրներին:

Նախագահ Արմեն Սարգսյանն էլ այսօր հանդիպել է Արշակյանների ընտանիքին: Ապարան քաղաքում բնակվող Սամվել եւ Արփիկ Արշակյանների որդու՝ 10-ամյա Ռոմիկի մոտ ախտորոշվել է լեյկոզ եւ ոսկորների ախտահարում, երեխան գտնվում է ռեմիսիայի շրջանում:

Լավ է, որ նախագահը հանդիպել եւ իր աջակցությունն է հայտնել երեխային եւ նրա ընտանիքի անդամներին, բայց մտահոգիչ է, որ նա փոքրիկ Ռոմիկին խոստացել է սովորեցնել, թե ինչպես պետք է նախագահ դառնա եւ նախագահ լինի:

Աստված օգնական փոքրիկ Ռոմիկին, որն արդեն հաղթահարում է ծանր հիվանդությունը, բայց նա նախագահ դառնալու համար Արմեն Սարգսյանից ոչինչ չի կարող սովորել:

Ի՞նչ սովորի, թե ինչպես զբաղեցնել պաշտոնը եւ հեռու մնալ երկրում կատարվող իրադարձություններից չհայտնելով ոչ մի կարծիք կամ տարվա մեծ մասն անցկացնել արտերկրում, այս կամ այն բիզնես-ֆորումներին մասնակցելու պատրվակով սեփական բիզնեսի խնդիրները լուծելով:

Ռոմիկը այլ մարդկանցից կարող է սովորել նախագահ դառնալու եւ աշխատելու հմտությունները, իսկ Արմեն Սարգսյանից կարող է սովորել ստորագրել խորհրդարանի ընդունած ակնհայտ հակասահմանադրական օրենքը:

Մի խոսքով, հորդորում ենք Արմեն Սարգսյանին Ռոմիկին եւ ոչ մեկին չփորել սովորեցնել նախագահ ախատելու հմտությունները: Այսպես ավելի անվտանգ կլինի երկրի եւ ժողովրդի համար:

Վահրամ Գեւորգյան

Top-News.am