Արարատ Միրզոյանի սխալների շարանը

Արարատ Միրզոյանը սխալներ շատ է անում: Քիչ է խոսում, բայց հենց արտահայտվում է գրեթե միշտ կոպիտ վրիպում է թույլ տալիս: Սա այսօրվա Հայաստանն է, սա այսօրվա Հայաստանի ղեկավարի միջին վիճակագրական պատկերն է:

Երբ նոր էր պատրաստվում ԱԺ նախագահ դառնալ, որոշեց հեռակա բանավեճի մեջ մտնել Ադրբեջանի արտգործնախարար Էլմար Մամեդյարովի հետ, որը հերթական անգամ հայտարարել էր, թե պատրաստ են Արցախին բարձր ինքնավորություն շնորհել: «Դուխով» Արարատ Միրզոյանն ասել էր, թե Մամեդյարովին խորհուրդ է տալիս առաջարկը ներկայացնել նաեւ Արցախի ժողովրդին։ Իսկ եթե ներկայացնե՞ր:

Երբ Արարատ Միրզոյանն արդեն ԱԺ նախագահ էր, հայտարարեց, թե շատ ճիշտ է, որ արհեստածին տոնի՝ քաղաքացու օրվա համար բյուջեից հատկացվել է 250 հազար դոլար: 

Չանդրադառնանք «բեսեդկում լռվելու սիրահար» ԱԺ նախագահի մյուս սխալներին եւ կենտրոնանանք առայժ վերջին կոպիտ սխալի վրա:

Իմքայլական ԱԺ նախագահն իրենց խմբակցության ոգով հերթական ֆեյսբուքյան գրառումն է արել. «Բուրբոնները ոչինչ չսովորեցին (չհասկացան)... Ֆրանսիական հեղափոխությունից հետո տարիներ անց արտաբերված այս խոսքը հիշեցի՝ տեսնելով, թե ինչպես են հնի որոշ մոլեռանդ ջատագովներ հայտնի կենդանու համառությամբ 2018-ի համաժողովրդական հեղափոխությունը անվանում հեղաշրջում։ Ողջություն և խաղաղություն բոլորին»:

Քաղաքական ընդդիմախոսներին վիրավորելու մղումը արդեն դարձել է իմքայլականների անբաժան ուղեկիցը, այնպես որ, հիմա կանգ չառնենք այն փաստի վրա, թե ինչու է այսքան բարձր պաշտոն զբաղեցնող երիտասարդը անպայման իր քաղաքական մրցակիցներին համեմատում իրեն հայտնի կենդանու հետ եւ վերադառնանք հեղափոխությանը:

Հատուկ Արարատ Միրզոյանի համար մեջբերում հանրագիտարանից, որից հետո նա գուցե վերանայի իր վերաբերմունքը 2018-ին Հայաստանում տեղի ունեցած իրադարձության վերաբերյալ. «Արմատական եւ կտրուկ հեղաշրջում հասարակական-քաղաքական հարաբերություններում, որը հանգեցնում է հասարակական կարգի փոփոխության»:

Եթե Արարատ Միրզոյանը կարծում է, որ Հայաստանում հասարակարգ է փոխեվել, եթե կարծում է, որ մեր երկրում հասարակական-քաղաքական հարաբերություններում կտրուկ փոփոխություններ են տեղի ունեցել, եթե կարծում է, որ իր իսկ ասած հեղափոխությունից հետո Փաշինյանին վարչապետ չի ընտրել գործող, ՀՀԿա-ական մեծամասնություն ունեցող խորհրդարանը, ապա մենք գործ ունենք առանձնահատուկ դեպքի հետ, որն առանձնահատուկ ուսումնասիրության կարիք է զգում:

Վարդան Մխիթարյան

Top-News.am