ԵԽԽՎ. Զերծ մնացեք դատական համակարգի վրա ճնշումներ գործադրելուց

Հայաստանի հարցով ԵԽԽՎ համազեկուցողներն արձագանքել են կառավարության գործողություններին ընդեմ ՀՀ Սահմանադրական դատարանի եւ նրա նախագահ Հրայր Թովմասյանի:

«Մենք շատ մտահոգված ենք Հայաստանի երկու ինստիտուտների ՝ Վարչապետի գրասենյակի եւ Սահմանադրական դատարանի նախագահության միջեւ լարվածության բարձր մակարդակից»,- նշել են ԵԽԽՎ համազեկուցողները ՝ Անդրեյ Շիրցելը (Սլովենիա) եւ Կիմմո Կիլյունեն (Ֆինլանդիա):

«Վերահսկողությունը եւ հակակշիռները անհրաժեշտ են ցանկացած ժողովրդավարական համակարգում: Սա ենթադրում է, որ բոլոր ինստիտուցիոնալ լիազորոսւթյունները պետք է գործեն ըստ օրենքի գերակայության, եւ հարգեն այն իրենց գործերով եւ խոսքով, ներառյալ անմեղության կանխավարկածի սկզբունքը: Եթե նրանք չկարողանան համագործակցել այս սկզբունքների համաձայն, նրանք քայքայում եւ վնասում են միմյանց: Ուստի մենք անհանգստացած ենք այն երկարաժամկետ վնասներից, որոնք կարող է հանգեցնել այդ լարվածությունը, որոնք հասել են աննախադեպ մակարդակի, եւ դա կարող է պատճառ դառնալ ամբողջ դատական համակարգի հեղինակազրկմանը, որի նկատմամբ վստահությունն արդեն իսկ շատ ցածր է»,- նշել են համազեկուցողները:

«Մինչ այժմ կառավարությունն ու խորհրդարանը հարգել են իրավիճակը կարգավորելու իրավական ընթացակարգերը: Ավելին, իշխանությունները հայցել են Վենետիկի հանձնաժողովի կարծիքը Սահմանադրական դատարանի դատավորների վաղաժամկետ կենսաթոշակի անցնելու մեխանիզմի վերաբերյալ: Համաձայն եվրոպական չափորոշիչների, Վենետիկի հանձնաժողովն ընդգծել է, որ վաղաժամկետ կենսաթոշակի անցնելը պետք է լինի խիստ կամավոր, եւ որ այդ սկզբունքը պետք է պահպանվի: Որպես համազեկուցողներ, մենք ուշադիր հետեւելու ենք, որ ՀՀ իշխանությունները շարունակեն գործել այս ճանապարհով, նույնիսկ եթե այդ մեխանիզմի նպատակը, 2015-ի սահմանադրական փոփոխությունների ոգին պահպանելն է»,- հավելել են Շիրցելն ու Կիլյունենը:

«Մենք արդեն իսկ շեշտել ենք, որ քաղաքական ուժերը պետք է զերծ մնան գործողություններից եւ հայտարարություններից, որոնք կարող են ընկալվել որպես դատական համակարգի վրա ճնշման գործադրում: Բացի այդ, մենք կոչ ենք անում բոլոր կողմերին նվազեցնել լարվածությունը»,- ընդգծել են համազեկուցողները:

«Վերջապես, այդ լարվածությունը չպետք է խցանի Հայաստանում իրականացվող բարեփոխումների անհրաժեշտությունը` լինի դա նախապատրաստական փուլում կամ էլ նրանք, որոնք արդեն մեկնարկել են ԵԽԽՎ-ի համար հետաքրքրություն ներկայացնող շատ ոլորտներում», - եզրափակել են Հայաստանի հարցով համազեկուցողները:

Top-News.am