«Վարչապետը ձեռքը փրփուրներին է գցել, քանի որ Հրայր Թովմասյանը նրան ստի մեջ «բռնացրեց»». Քաղտեխնոլոգ

Քաղտեխնոլոգ Արմեն Բադալյանի խոսքով՝ երկիրը փաստերով չեն կառավարում, ուստի պետք չէ եռամսյակը մեկ հրապարակել 100 փաստ և համարել, թե երկրում դրական փոփոխություններ կան։

«Սա դպրոց չէ, դպրոցական առարկաների դասավանդում չէ, որ դասը սովորեն, հետո օրագիրը տանեն՝ գնահատականը նշանակեն։ Երկիրը կառավարվում է հայեցակարգերով, ներդրումներով, հստակ ու ճիշտ քաղաքականություն իրականացնելով։ Երկրի ներսում ու դրսում կարող է տեղի ունենալ մեկ փաստ, օրինակ, ինչ-որ համաձայնագրի կնքում, որը կլինի շատ կարևոր, քան 100 փաստը։ Բայց ինչպես տեսնում ենք՝ վարչապետն ունի իր պատկերացնումները, մասնավորապես՝ առ այն, որ երկիրը կարելի է ղեկավարել փաստերով, և որքան շատ փաստեր հրապարակի, այնքան լավ ժողովրդի համար։ Երկրի կառավարման վերաբերյալ վարչապետի պատկերացումներն այսպիսին են և այլևս չեն փոխվում»,- այս մասին 168.am-ի հետ զրույցում ասաց Արմեն Բադալյանը՝ անդրադառնալով վարչապետի Կապանում կայացած մամուլի ասուլիսի ընթացքում հրապարակված՝ Նոր Հայաստանի մասին 100 փաստերին։

Ըստ քաղտեխնոլոգի՝ 5 ժամ մամուլի ասուլիս տալը խոսում է այն մասին, որ վարչապետը 5 ավելորդ ժամ ունի, քանի որ նրա մամուլի ասուլիսը լավագույն դեպքում կարող էր լինել 1 ժամ, որի ընթացքում նա կարող էր իր տեսակետները հնչեցնել։

«Եթե, օրինակ, ՌԴ նախագահն է մամուլի ասուլիս տալիս, և այն տևում է 4-5 ժամ, դա հասկանալի է, քանի որ Ռուսաստանի ու Հայաստանի մասշտաբներն անհամեմատելի են։ Ընդ որում, դա տեղի է ունենում տարին մեկ անգամ, այլ ոչ թե՝ եռամսյակը մեկ։ Այստեղ տրամաբանություն չկա, և ֆիզիկապես այլևս այդ ասուլիսները լսելու չեն»,- շեշտեց Արմեն Բադալյանը։

Անդրադառնալով Սահմանադրական դատարանի և Հրայր Թովմասյանի շուրջ ստեղծված գործընթացներին, մասնավորապես՝ գրիչի հայտնի պատմությանը, Արմեն Բադալյանը նկատեց՝ այս ամենն արդեն հասնում է անլրջության մակարդակի։

Ավելին՝ արդեն երկու տարի է՝ վարչապետը Հայաստանում փորձում է կառուցել իր «անձնիշխան համակարգը», որը չի հանդուրժում այլընտրանք։

Արմեն Բադալյանի դիտարկմամբ՝ Սահմանադրական դատարանը, ինչպես նաև մի քանի այլ կառույցներ՝ Արցախի իշխանական համակարգը, մի շարք լրատվամիջոցներ, Առաքելական եկեղեցին և այլն, այս պահին դեռևս վարչապետի հսկողության տակ չեն, ինչը Նիկոլ Փաշինյանը չի կարող հանդուրժել։
«Տևական ժամանակ է՝ վարչապետն իրականացնում է տարբեր գործողություններ, որպեսզի ազատվի ՍԴ նախագահ Հրայր Թովմասյանից, պատճառ են բերում, թե ՍԴ-ն կնքել է ընտրությունների արդյունքները՝ մոռանալով, որ դրան մասնակից են եղել նաև ընտրական տարբեր հանձնաժողովներ։ Սա ընդամենը պատրվակ է, խնդիր է դրված՝ տեղում վերցնել ՍԴ-ն, հիմա չի հաջողվում։ Երբ այս ամենի համար պատասխան պահանջվեց, վարչապետը բերեց ինչ-որ գրիչի պատմություն։

Ի դեպ, եթե գրիչն այդքան թանկարժեք էր, այն վարչապետը կարող էր հանձնել պետական բյուջե։ Կամ՝ եթե մարդն ունի թանկարժեք գրիչ, ապա դա դեռ չի նշանակում, որ նա կոռուպցիոներ է, քանի որ դեռ չգիտեն, թե այն ինչպես է ձեռք բերել. գուցե ինչ-որ մե՞կն է նրան նվիրել, չմոռանանք, որ Հրայր Թովմասյանը նախկինում պատգամավոր է եղել։ Ինչպես ասում են՝ վարչապետը ձեռքը փրփուրներին է գցել՝ ցույց տալու համար, որ ինքը ճիշտ է, քանի որ, ըստ էության, Հրայր Թովմասյանը նրան ստի մեջ «բռնացրեց»»,- ընդգծեց նա։

Ինչ վերաբերում է ասուլիսի ժամանակ վարչապետի հիշատակումներին «Կարգին հաղորդում» սքեթչին և դիտարկմանը, որ լրագրողը կարող է իր բոլոր հարցերի պատասխաններն այդ սքեթչում փնտրել, Արմեն Բադալյանն ընդգծեց, որ վարչապետ Փաշինյանը լրագրողների կողմից հնչեցրած հարցերին պատասխաններ չուներ, այդ պատճառով էլ վկայակոչում էր «Կարգին հաղորդումը», բացի այդ, փորձում էր թեմաներն անլրջացնել և խուսափել ուղիղ պատասխանից։

«Երբ լրագրողը հարց է տալիս, երկրի ղեկավարը պարտավոր է տալ ուղիղ պատասխան, կամ ասել, որ չի ցանկանում այդ հարցին պատասխանել։ Այս ամենն ուղղակի արդեն այլևս մեկնաբանելու էլ չէ, որովհետև այդ գործընթացներն արդեն շրիշակից էլ ցածր մակարդակի վրա են»,- եզրափակեց Արմեն Բադալյանը։

168.am