Disney ստուդիան «Առյուծ արքա»-ից հետո պլանավորում է էկրանավորել «Բեմբի» դասական մուլտֆիլմը

Ամերիկյան Disney ստուդիայի կողմից դասական մուլտֆիլմերի հաջորդ ժամանակակից էկրանավորումը «Բեմբի»-ն կլինի, հայտնում է Deadline հրատարակությունը:

Նոր ֆիլմում կենդանի բնության նկարահանումները կհամատեղվեն անիմացիոն հերոսների հետ:

Սցենարական խմբի անդամ են «Կապիտան Մարվել»-ին և «Վտարանդին-մեկ. Աստղային պատերազմներ. Պատմություններ»-ի աշխատանքներին մասնակցած մասնագետները: Կինոնկարի պրոդյուսերական աշխատանքները կկատարի Depth of Field ընկերությունը, որը ռեժիսոր Ռոբերտ Զեմեկիսի հետ նաև աշխատում է «Պինոկիո»-ի էկրանավորման վրա:

2019 թվականին «Առյուծ արքա»-ի էկրանավորումը, որը հնչյունավորել են Բեյոնսեն և Դոնալդ Գլովերը, համաշխարհային կինովարձույթում հավաքել է 1,66 միլիարդ դոլար:

Եղնիկի մասին այս դասական անիմացիոն մուլտֆիլմը լույս է տեսել 1942 թվականին: